В «Қазақмыс Корпорациясы» ЖШС кеніште жеті жұмысшы қаза тапқан оқиға бойынша тау массасының құлағаны туралы алғашқы нұсқаны жоққа шығарды.
Компанияның баспасөз қызметінің мәліметінше, авариялық-құтқару бригадалары шахтада ешқандай құлау анықтамаған. Кеніштің жұмысы тергеу аяқталғанша тоқтатылды.
«Табиғи газдың шығуына байланысты оқиғаның себептеріне талдау жүргізілуде. Компания үкіметтік комиссиямен және тергеу органдарымен белсенді ынтымақтастықта жұмыс істеп, өзінің қауіпсіздік стандарттарына түзетулер енгізуді көздейді», - делінген хабарламада.
Сондай-ақ «Қазақмыста» өтемақы төлеу, денелерді тасымалдау, несиелік міндеттемелерге көмек көрсету және қаза тапқан шахтерлердің отбасы мүшелерін жұмысқа орналастыру бойынша есеп берілді.
«Компания басшылығы қаза тапқандардың отбасыларына барып, көңіл айтты. Сондай-ақ компания денелерді Қазақстанның әр түрлі аймақтарына тасымалдау шығындарын өз мойнына алды. Туыстарының өтініші бойынша үш кеншінің денесі Түркістан және Қарағанды облыстарына, қалғандары Жезқазған және Сәтбаев қалаларына жеткізілді. Жақын арада жұмысқа орналастыру және тұрғын үй жағдайын жақсарту мәселелерін талқылау үшін отбасылармен кездесулер ұйымдастырылады», - делінген хабарламада.
Сонымен қатар қаза тапқандардың отбасыларына жерлеу рәсіміне 550 АЕК (2,2 млн теңге) бөлінді. Болашақта оларға жылдық жалақының 10 еселенген мөлшерінде төлем жасау уәде етілді, оның сомасы 84 пен 141 млн теңге аралығында болады.
«Сонымен қатар, қаза тапқан шахтерлердің банктер алдындағы қарыздарына бағалау жүргізілуде. Қаза тапқандар мен олардың жақын туыстарының барлық борыштық міндеттемелерін нақтылау үшін ҚР Қаржы нарығын реттеу және дамыту агенттігіне хаттар жіберілді. Қазіргі уақытта Bank RBK, Kaspi және Halyk Bank-те жалпы сомасы 47,5 млн теңге болатын несиелер мен ипотекалар анықталды. Оларды өтеу бойынша жұмыс жүргізілуде», - деп қорытындылады компания.
Еске салайық, бастапқыда ҚР ТЖМ баспасөз қызметі Ұлытау облысы Жаңаарқа ауданындағы «Қазақмыс Корпорациясы» ЖШС компаниясының «Жомарт» кенішінде жеті шахта жұмысшысы қаза тауып, тау массасының құлағаны туралы хабарлаған болатын.