«Жомарт» кенішіндегі «Қазақмыс Корпорациясы» ЖШС компаниясының Ұлытау облысы Жаңаарқа ауданында шахтада тау жынысының құлауы болды.
ҚР ТЖМ баспасөз қызметінің мәліметінше, үйінді астында шахтаның жеті жұмысшысының денесі қалған. Олар жер бетіне көтеріліп, сот-медициналық сараптама жүргізу үшін полиция қызметкерлеріне тапсырылды. Алдын ала мәліметтер бойынша, опырылудың себебі табиғи газдың жарылуы болған.
Премьер-министр Олжас Бектеновтің тапсырмасы бойынша қайғылы оқиға орнында себептерді тергеу және зардап шеккендерге көмек көрсету жөнінде арнайы комиссия құрылды.
Облыстық полиция департаменті бұл факті бойынша ҚР ҚК 277-бабы 3-бөлігі «Тау-кен немесе құрылыс жұмыстарын жүргізу кезінде қауіпсіздік ережелерін бұзу» бойынша қылмыстық іс қозғалғанын хабарлады.
Өз кезегінде «Қазақмыс» басшылығы мен ұжымы қайтыс болғандардың туыстары мен жақындарына көңіл айтты. Компания барлық қажетті көмекті көрсетуге уәде берді.
«Қайтыс болғандардың отбасыларына әлеуметтік және материалдық қолдау көрсету, оның ішінде моральдық зиянды өтеу мақсатында жұмысшының орташа жылдық жалақысының 10 еселік мөлшері, сондай-ақ жерлеуді ұйымдастыруға 2 млн теңгеден астам қаражат төленетін болады», - делінген хабарламада.
Сонымен қатар асыраушысынан айырылу бойынша ай сайынғы төлемдер, балалардың оқу ақысын төлеу, қайтыс болған жұмысшылардың несиелері мен қарыздарын өтеу және отбасы мүшелерінің өтініші бойынша өзге де көмек түрлері қарастырылған.
Президент Қасым-Жомарт Тоқаев қайтыс болғандардың туыстары мен жақындарына көңіл айту жеделхатын жолдады. Мемлекет басшысы үкіметке оқиғаның себептерін мұқият тергеуді тапсырды.
Еске салайық, 2023 жылғы 6 қарашада «Қазақмыс» компаниясының шахтасында жұмыс орындау кезінде тау-кен шебері қайтыс болды. Сонда трагедия бақытсыз жағдай ретінде сараланды.
Қарашаның 27-сінде «Қазақмыс» компаниясы Жамбыл облысындағы «Жайсан» кенішінде болған бақытсыз жағдай туралы хабарлады, нәтижесінде екі жұмысшы қайтыс болды.
Желтоқсан айында Ұлытау облысындағы «Қазақмыс» компаниясының «Жыланды» кенішінде тағы бір жұмысшы қайтыс болды. Кәсіпорынның баспасөз қызметі онда өлім жер асты өздігінен жүретін машинаның қасақана емес соққысы салдарынан болғанын хабарлады.
2024 жылғы қазанда Қарағанды облысындағы «Қазақмыс» корпорациясының «Саяқ-3» шахтасында көміртегі тотығы шықты. Екі жұмысшы қайтыс болды, тағы бірнешеуі ауруханаға жеткізілді.
2025 жылғы қаңтарда Ұлытау облысындағы «Қазақмыс» компаниясының Шығыс-Жезқазған кенішінің «Анненская» шахтасында өндірістегі бақытсыз жағдай салдарынан 5 разрядты ұсақтаушы қайтыс болды.