Электрондық сауда алаңында ҰҚК бұрынғы төрағасы Кәрім Мәсімовтің особнягінен алынған заттарды сату бойынша аукциондар өтті. Сауда-саттық 16 қыркүйекте өтті, бес лот сатылды.
Informburo.kz мәліметтері бойынша, ең қымбат лот — кенгуру бейнеленген, номиналы 200 доллар болатын II Елизавета сериясындағы алтын монета болды. Ол үшін төрт қатысушы күресті: бастапқы баға 3,2 млн теңгеден 4,3 млн теңгеге дейін өсті.
Ең арзаны бижутерия жиынтығы болды. Ол бастапқы бағасы 22 мың теңге бола тұрып, 42 мың теңгеге сатылды.
Сонымен қатар, мыналар сатылды:
- түсті эмальмен және сүйектен жасалған кірістірмелермен безендірілген қынаптағы қылыш – 385 мың теңгеге;
- екі кавказдық қанжар – 438 мың теңгеге;
- сары металдан жасалған қынаптағы пышақ – 155 мың теңгеге.
Мемлекеттік активтерді басқару комитетінде (МАБК) бұл бұйымдардың кімнен алынғанын нақтыламайды, алайда олар Кәрім Мәсімовке тиесілі особняктің мүлік тізбесіне кіретіні белгілі.
Айта кетейік, Астанадағы Мәсімовтің особнягін сатуға үш рет тырысқан, бірақ сатып алушылар табылмаған. МАБК нысанды қала әкімдігіне беру туралы ресми сұрау салу алғанын хабарлаған. Алайда кейін әкімдік ғимаратты теңгерімге қабылдау мәселесі қарастырылмайтынын мәлімдеген.
Еске салайық, 2023 жылдың сәуірінде Кәрім Мәсімов мемлекетке опасыздық жасау, билікті күшпен басып алуға әрекет жасау, билікті асыра пайдалану және лауазымдық өкілеттіктерін асыра пайдаланғаны үшін 18 жылға бас бостандығынан айыруға сотталған.