Белгісіз ер адам Астанадағы Министрліктер үйінің №11 кіреберісіне тұтандырғыш қоспаны лақтырды. Күдікті ұсталды.
Бұл туралы Informburo.kz астаналық төтенше жағдайлар департаментінің баспасөз қызметіне сілтеме жасап, оқиға 10 шілдеде таңертең болғанын хабарлайды.
«Автоматты өрт дабылы іске қосылып, оқиға орнына департаменттің күштері мен құралдары жедел келді. Барлау барысында белгісіз біреудің ғимаратқа кіріп, турникетке тұтандырғыш қоспаны лақтырғаны, нәтижесінде шамамен екі шаршы метр аумақта өрт болғаны анықталды», – делінген хабарламада.
Өрттің өрт сөндіргішпен жойылғаны атап өтілді. Оқиға салдарынан ешкім зардап шеккен жоқ.
Астаналық полиция департаменті 24 жастағы күдіктіні ұстағанын хабарлады. Сотқа дейінгі тергеу жүргізілуде, оның барысында болған оқиғаның барлық мән-жайын анықтауға уәде берді.