«Нурбанк» АҚ Бірыңғай жинақтаушы зейнетақы қорына (БЖЗҚ) 240,8 млн теңге көлемінде дивиденд төлеген жоқ.
«Қазинформ» ХАА деректеріне сәйкес, Қаржы нарығын реттеу және дамыту агенттігінде (ҚНРДА) БЖЗҚ «Нурбанктің» 120 398 артықшылықты акциясының иесі екенін хабарлады.
«Жыл сайын қор 120 398 000 теңге мөлшерінде дивиденд алып тұрды, бұл әрбір акцияға 1000 теңгеден келеді. Алайда 2023 жылы банк 2022 жыл үшін дивиденд төлемеді. Себеп ретінде банк Қаржы нарығын реттеу және дамыту агенттігінің дивидендтер төлеуге қатысты №21 қаулысында белгіленген шектеулерге сілтеме жасады. Бұл банктің ҚР банк секторының қаржылық тұрақтылығын қамтамасыз ету бағдарламасына қатысушы болуымен түсіндіріледі», — делінген хабарламада.
Нәтижесінде БЖЗҚ банкке дивидендтерді 240,8 млн теңге мөлшерінде, сондай-ақ мерзімі өткені үшін айыппұл ретінде 25,8 млн теңгені төлеуді талап етіп, сотқа жүгінді. Белгілі болғандай, сот тартыстары 2024 жылдың қарашасынан 2025 жылдың ақпанына дейін созылды.
«Алматы қаласының мамандандырылған ауданаралық экономикалық соты қордың талабын ішінара қанағаттандырып, Қаржы нарығын реттеу және дамыту агенттігінің №21 қаулысында белгіленген дивидендтер төлеу бойынша шектеулердің бар екеніне сілтеме жасады. Сот банктен 2022 жылға арналған дивидендтер сомасын 120,4 млн теңге көлемінде толық көлемде Бірыңғай жинақтаушы зейнетақы қорының пайдасына өндіріп алуды шешті. Талаптың қалған бөлігін сот қанағаттандырмады», — деп хабарлады қордан.
Ресми мәлімдемеде нақтыланғандай, өндіріп алынған сома салымшылардың шоттарына аударылады.
«Қолданыстағы заңнамаға сәйкес, «Нурбанк» АҚ-дан Бірыңғай жинақтаушы зейнетақы қорының пайдасына 120 398 000 теңге көлемінде алынған артықшылықты акциялар бойынша дивидендтер кіріс ретінде танылып, салымшылардың шоттарына есептелетін болады», — деп түсіндірді мәлімдемеде.
Еске сала кетейік, қаңтар айында ҚНРДА «Нурбанк» АҚ қызметінде бұзушылықтарды анықтады. Сол кезде «Нурбанк» Қаржы мониторингі агенттігіне (ҚМА) міндетті мониторингке жататын деректерді ұсынбағаны хабарланған еді. Ол үшін банкке 14,4 млн теңге көлемінде айыппұл салынды.