Экология және табиғи ресурстар министрі Ерлан Нысанбаев Арал теңізін қалпына келтіру үшін жасанды түрде жаңбыр жаудыруға арналған аппарат ойлап тапқан «жаңбыр адамы» - Алтай Айнабектің қызметіне түсініктеме берді.
Informburo.kz деректеріне сәйкес, экология министрі өнертапқыштың тәсілінің нақты қолданылуының дәлелі жоқ екенін атап өтті. Нысанбаев Айнабек жаңбыр жаудырған күндері «Қазгидрометтің» ауа райы болжамы бойынша да жауын-шашын болуы керек екенін мәлімдеді.
«Алғашқы он күндік болжам дәл болды. Бүкіл әлемде болжаммен айналысатын ғалымдар мен тиісті мекемелердің пікірінше, бұл тәсіл зерттелген және нақты қолданылуының дәлелі жоқ. Біз Аралдағы жағдайға қызығып, «Қазгидрометтен» мамандарымызды шақырдық. Біздің болжамдарымыз бойынша, сол күндері жаңбыр жаууы керек еді. Сондықтан, бүкіл әлем ғалымдарының ұстанымы туралы айтатын болсақ, бұған сенбеу керек», – деді Нысанбаев.
Арал теңізін құтқару халықаралық қорының деректері бойынша, соңғы онжылдықтарда Аралдың көлемі он есеге жуық азайды, алайда биылғы жылдың басынан бастап теңіздің солтүстік бөлігіндегі су көлемі қайтадан өсе бастады.
Сонымен қатар, ФБРК негізін қалаушы Кирилл Павлов бірнеше жыл бұрын өзінің YouTube-арнасында жаңбыр жаудыратын жасанды қондырғылар туралы бейнеролик жариялаған болатын.
Сол кезде Маңғыстау облысында жаңбыр жаудыратын бірнеше қондырғы орнатылды. Олар жауын-шашын мөлшерін 30%-ға арттырады деп болжанған. Қондырғылардың құны 5-тен 10 млн еуроға дейін өзгерген.
Павлов осындай ірі сомалардың неге жұмсалатынын көру үшін өңірге барып, мұндай жаңбыр қондырғысы жауын-шашын мөлшеріне әсер етпейді деген қорытындыға келді. Сарапшының пікірінше, оның көмегімен кейбір мүдделі тұлғалар тек баюға тырысады.