Денсаулық сақтау саласының бұрынғы вице-министрі Олжас Әбішев Қазақстанның денсаулық сақтауды цифрландыру жүйесінде бағдарламалық шешімдердің қайталануы анықталғанын хабарлады.
Ол Facebook-тегі парақшасында мәлімдегендей, деректер алмасуға арналған негізгі XML-файлдардың бірі хорватиялық «Эриксон Никола Тесла» компаниясының әзірлемесінің қайта өңделген нұсқасы болып шықты.
«Мәселе екі файлға қатысты: «GetRecipeInsertedFromMISDataRequest.xml» (бұдан әрі — «1-файл») және «Пример запроса 1.xml» (бұдан әрі — «2-файл»). Екі файл да медициналық ақпараттық жүйелердегі рецептілермен жұмыс істеуге арналған. 1-файл рецептілер туралы негізгі ақпаратты беру үшін пайдаланылса, 2-файл дәрі-дәрмектер мен медициналық құрылғылардың сипаттамасы сияқты мәліметтерді қосады», — делінген хабарламада.
Бұрынғы вице-министрдің айтуынша, талдау екінші файлдың бірінші файлдың құрылымын толығымен дерлік қайталайтынын, тек бірнеше жаңа элементтердің қосылғанын көрсеткен.
«Денсаулық сақтау министрлігі 2-файлды айтарлықтай инвестиция мен уақытты қажет ететін жаңа әзірлемелердің нәтижесі ретінде ұсынады. Алайда, талдау нәтижелеріне сенетін болсақ, мамандар жаңа өнім жасаудың орнына, бар құжатты қайта өңдеген. 1-файл енгізілмеген деп танылып, бұл үшін тіпті мені және Елжан Біртановты айыптаған болатын», — деп мәлімдейді Әбішев.
Еске салайық, 2020 жылғы қарашада денсаулық сақтау саласының бұрынғы министрі Елжан Біртанов және оның орынбасары Олжас Әбішев қамауға алынған еді. Оларға қатысты бюджет қаражатын ерекше ірі мөлшерде жымқырды деген күдікпен қылмыстық іс қозғалған. Кейін ол «ұрлықтан» «өкілеттіктерді теріс пайдалануға» қайта сараланған.
2022 жылғы қазанда сот Біртанов пен Әбішевті кінәлі деп танып, оларға тиісінше 5 және 4 жыл бас бостандығын шектеу жазасын тағайындаған.
Сонымен қатар, сот Біртанов пен Әбішевтен денсаулық сақтау министрлігінің пайдасына 1,3 млрд теңге көлеміндегі материалдық залалды, сондай-ақ әрқайсысынан мемлекет кірісіне 20,2 млн теңге өндірген.