«Болашақ» халықаралық бағдарламалар орталығы бағдарламаға қатысушының кепілгерлері болған адамдардың мәлімдемесіне түсініктеме берді. Олардың айтуынша, қатысушы заңды құқығы болмаса да, пәтерлерді кепілден шығарып алған.
Бұған дейін олар бұрынғы әріптесі Валерия Гавриленко үшін кепілгер болғандарын, ол «Болашақ» бағдарламасы бойынша сәтті оқып бітіріп, 2019 жылы «Орталық қызметкерлерімен сөз байласып, өзінің екі пәтерін Орталықтың кепілінен заңсыз шығарып алып, Ұлыбританияға тұруға кеткенін» мәлімдеген.
Орталықтың баспасөз қызметінің дерегінше, бір кездері Гавриленко кепіл ретінде екі жылжымайтын мүлік нысанын ұсынған. Алайда олардың құны оқудың толық құнын өтемеген, осыған байланысты стипендиат үшін екі «кепілгер» - Дарибаева мен Воробьева ресми түрде кепілдік берген, Орталық 2016 жылы олармен кепілдік шарттарын жасасқан.
«М.А.Дарибаева, Н.А.Воробьева Кепілдік шартының 2.1, 2.2-тармақтарына сәйкес оқуды ұйымдастыру шарты бойынша барлық міндеттемелерді орындау үшін толық ортақ жауапкершілікті өз мойнына алды, сондай-ақ Шарттың 2.4-тармағында стипендиаттың Орталық алдындағы міндеттемелерін орындамаған және/немесе тиісінше орындамаған жағдайда, стипендиаттың міндеттемені орындау туралы талабын қанағаттандырмаған кезде Орталықтың аталған талапты орындалмаған бөлігінде кепілгерге қоюға құқығы бар екендігі айқындалған», - делінген хабарламада.
2019 жылғы 13 мамырда Орталықтың бұрынғы президенті Мелдешов Ж., вице-президент Алпысбай М. және заң департаментінің бастығы Шарамбаев А. стипендиаттың міндеттемелерін толық орындауына байланысты жылжымайтын мүліктен кепілді алып тастау туралы хабарлама бергені хабарланды. Яғни, оның еңбек қызметі басталғаннан кейін бір жыл өткен соң.
Осы фактілер анықталғаннан кейін Орталық бірнеше рет Орталықтың бұрынғы лауазымды тұлғаларына қатысты қызметтік жалғандық жасау фактілері бойынша тиісті органдарға өтініштер жолдаған.
Белгілі болғандай, 2024 жылғы сәуірде Орталық Гавриленко В.-ның нақты орналасқан жерін анықтау мақсатында ҚР ҰҚК және ІІМ -не хаттар жолдаған.
«Қазіргі уақытта Орталық «Болашақ» бағдарламасының басқа елдерде жүрген, мемлекет алдындағы шарттық міндеттемелерін орындамайтын стипендиаттарын «қайтару» бойынша жүйелі жұмыс жүргізуде», - делінген хабарламада.
«Болашақ» бағдарламасының 13 мың түлегінің 1%-тен азы оқуды аяқтай алмағаны немесе мемлекет алдындағы еңбек міндеттемелерін орындамағаны және шәкіртақыдан айырылғаны атап өтілді.
«Орталық ай сайын мемлекеттік бюджетке шамамен 200 млн теңге қайтарады. 2023 жылы бюджетке 1,9 млрд теңге қайтарылды, 2024 жылғы 27 мамырдағы жағдай бойынша – 716 млн теңге, 43 адам мемлекет алдындағы қарызын толығымен өтеді», - деп хабарлады Орталықтың баспасөз қызметі.
Еске салайық, бұған дейін желіде «Болашақ» бағдарламасының бұрынғы қатысушыларына кепілгер болған Наталья Воробьева мен Макпал Дарибаеваның Президентке үндеуі пайда болған еді. Белгілі болғандай, Гавриленко елде болмағандықтан, Орталық одан қарызды өндіре алмаған. Алайда 3 жылдан кейін «Болашақ» оның 30 млн теңгеге жуық қарызын кепілгерлерге шығарған.