13 тамызда әлеуметтік желілерде Алматы облысы Қарасай ауданы Долан ауылының тұрғындары судың жоқтығынан жолды жауып тастағаны көрініп тұрған видео пайда болды. Олар өз мәселесіне биліктің назарын аудартуға тырысты.
«Қазинформ» ХАА мәліметі бойынша, жергілікті тұрғындар судың бір аптадан астам уақыт бойы жоқ екенін мәлімдеген.
Биылғы сәуір айынан бастап Долан ауылындағы сумен жабдықтау «Bey AzhTrans» ЖШС балансында екені хабарланады.
«Ауыз судың жоқтығына қатысты түсіндіреміз, 11 тамыз күні кешке тереңдік сорғысының істен шығуына байланысты су беру тоқтатылды, бүгінгі күні тереңдік сорғысы «Bey AzhTrans» ЖШС күшімен жаңасына ауыстырылды. Қазіргі уақытта су беру орташа қысыммен жүзеге асырылуда, су құбыры желілері мен су мұнарасын толтыру жалғасуда», — деп түсіндірді Алматы облысы әкімдігінің баспасөз қызметі.
Сондай-ақ әкімдікте 13 тамызда сумен жабдықтаудың уақытша тоқтатылуына байланысты Долан ауылындағы «Дихан» дүкенінің жанында 30 адамнан тұратын топ жиналғанын атап өтті.
«Тұрғындармен түсіндіру жұмыстары жүргізіліп, одан кейін олар тарады. Әлеуметтік желілерде таратылып жатқан өзге ақпарат шындыққа сәйкес келмейді. Жағдай жергілікті атқарушы органдардың бақылауында», — деп қосты әкімдікте.
Еске сала кетейік, Қызылорда әкімі Нұржан Ахатовтың бірнеше жылдан бері ауыз судың жоқтығынан зардап шегіп жатқан Сабалақ кенті тұрғындарымен кездесуі шенеуніктің бойында үлкен эмоция тудырды. Адамдар әкімді өз үйлеріне шақырып, жаңа басшы ауыз су мәселесін шеше алады деген үмітпен болды, алайда оның реакциясы екіұшты болды.