Астана қаласының әкімшілік істер жөніндегі сот алқасы жергілікті тұрғынның спорт жетістіктері үшін ақшалай көтермелеу төлеуден бас тартуды заңсыз деп тану туралы туризм және спорт министрлігіне қатысты әкімшілік талап-арызын қарады.
Елордалық соттардың баспасөз қызметінің мәліметінше, 2021 жылдың қазан айында Будапеште (Венгрия) гир спортынан әлем чемпионаты өтті, онда талапкер әртүрлі пәндер бойынша бірінші және үшінші орындарға ие болды.
Келесі жылдары — 2023 және 2024 жылдары — спортшы Хива (Өзбекстан) және Шолпан-Ата (Қырғызстан) қалаларында өткен әлем чемпионаттарында да жүлделі орындарға ие болды.
2024 жылдың қараша айында ол аталған чемпионаттардағы жүлделі орындары үшін ақшалай көтермелеу төлеу туралы өтінішпен туризм және спорт министрлігіне жүгінді.
Министрлік оның өтінішін қарап, 2023 және 2024 жылдардағы жетістіктері үшін төлемдерді жүзеге асыруға құжаттарды жіберді, алайда талап қою мерзімінің өткенін алға тартып, 2021 жылғы сыйлықақыларды төлеуден бас тартты.
Бірінші сатыдағы сот министрліктің әрекеттерін негізсіз деп танып, бұл жағдайда талап қою мерзімінің өткеніне сілтеме жасау қолданылуға жатпайтынын көрсетті.
«ҚР Үкіметінің 2014 жылғы 19 желтоқсандағы №1345 қаулысымен бекітілген Қағидалардың 4-тармағының ережелерінен ақшалай көтермелеу төлемі халықаралық спорт жарысының жүлдегеріне, яғни талапкерге жүзеге асырылуы мүмкін екендігі шығады. Демек, ол халықаралық спорт жарыстарында алған жүлделі орындары үшін ақшалай сыйақы алуға құқылы», - делінген хабарламада.
Апелляциялық саты бірінші сатыдағы соттың дәлелдерін қолдап, шешімді өзгеріссіз қалдырды.