Алматы әкімдігі өз қызметкерлеріне арналған жаңажылдық корпоративтік іс-шараларды өткізуді жоспарламайды.
Informburo.kz деректері бойынша, бұл туралы қалалық мәдениет басқармасы мәлімдеді. Ведомство сондай-ақ лауазымды тұлғаларға материалдық сыйақыларды, сыйлықтарды немесе қызметтерді қабылдауға тыйым салынғанын еске салды.
«Қызметкерлерді сыйақыландыру мемлекеттік орган басшысының бұйрығымен дербес құрылымдық бөлімшелер басшыларының жазбаша ұсынысы негізінде жүргізіледі. Бұл ретте сыйлықақы төлеуге бюджеттен қаражат бөлінбейді, төлемдер мемлекеттік органдарды ұстауға көзделген бюджет қаражатының үнемделуі болған жағдайда ғана жүзеге асырылады. Қызметкерлерге сыйлықақы мөлшері Қазақстан Республикасы Үкіметінің 2001 жылғы 29 тамыздағы N 1127 қаулысында көрсетілген шығыс баптары бойынша қатаң тәртіппен тиісті мемлекеттік органды ұстауға көзделген қаражаттың қорытынды сомасына, қалыптасқан үнемдеу сомасына қарай айқындалады», – делінген жауапта.
Осыдан біраз бұрын Астана әкімдігі де өз қызметкерлеріне арналған жаңажылдық корпоративті өткізуді жоспарламайтынын мәлімдеді.
Сондай-ақ қала әкімшілігі заң бойынша шенеуніктерге сыйлық қабылдауға тыйым салынғанын, бірақ рұқсат етілген лимит – 2 АЕК (7384 теңге) барын атап өтті. Сонымен қатар әкімдік өз қызметкерлерін сыйақыландыру туралы айтып берді.
«Әкімшілік мемлекеттік қызметшілерге бонустар төлеу олардың қызметін жыл қорытындысы бойынша бағалау нәтижелері бойынша жүзеге асырылады, ал жұмыстан босату, еңбек қатынастарын тоқтату және ротациялау жағдайларында әкімшілік мемлекеттік қызметшілерге бонустар төлеу олардың қызметін бағалау нәтижелері бойынша жұмыс істеген уақытына пропорционалды түрде жүзеге асырылады», – деді әкімдікте.
Өз кезегінде қаржы министрлігі мемлекеттік бюджетте мемлекеттік органдар қызметкерлеріне арналған жаңажылдық корпоративтерді өткізуге қаражат көзделмегенін атап өтті.