Астанада жоғары оқу орнының бұрынғы қызметкері сотталды, ол студенттер мен олардың ата-аналарының ақшасын иемденіп, оларды гранттық оқуға ауыстыруға уәде берген.
Астана прокуроры баспасөз қызметінің мәліметінше, түлектерді жұмысқа орналастыруға жәрдемдесу секторында лауазымды атқара отырып, сотталушы жәбірленушілерді академиялық үлгерім, грантқа ауыстыру және шәкіртақыны қайтару мәселелерін шеше алатынына сендірген.
2023-2024 жылдар аралығында ол 3 млн теңгеден астам қаражатты иемденгені хабарланады. Оның әрекеттерінен 15 адам зардап шекті.
Нәтижесінде сот ЖОО-ның бұрынғы қызметкерін белгіленген мерзімнің бүкіл кезеңіне пробациялық бақылау орнатумен 3 жылға бас бостандығын шектеуге үкім етті. Жәбірленушілерге келтірілген залал толық өтелді.
Естеріңізге сала кетейік, былтырғы мамыр айында «Марат Оспанов атындағы Батыс Қазақстан медицина университеті» КЕАҚ басқарма төрағасы - ректоры Әсет Калиев ұсталды. Ол 12 млн теңге көлемінде пара алды деген күдікке іліккен.
Шілде айында Астанадағы Гумилев атындағы Еуразия ұлттық университеті (ЕҰУ) қызметкерлері оқу орнының басшылығын ірі қаржылық бұзушылықтарда айыптады. Олардың айтуынша, ЕҰУ-да ғылым және жоғары білім министрлігі жыл сайын бөлетін қаражатты «қысқарту» дәстүрі қалыптасқан.
Қыркүйек айында М. Әуезов атындағы Оңтүстік Қазақстан университетінің ректоры Қайрат Нұрманбетов шамамен 28 млн теңге пара алды деген күдікпен ұсталғаны хабарланды.