Астанада мүгедектікті ресімдеуге көмектесемін деп алты пациентін алдаған дәрігерге үкім шығарылды.
Қалалық прокуратура баспасөз қызметінің мәліметінше, медик жұмыс орнында тікелей «қызмет» ұсынған, алайда мұндай мәселелерге жәрдемдесуге ешқандай өкілеттігі болмаған. Жалған делдалдық үшін ол пациенттерден 4 млн теңгеден астам ақша алған, оны жеке қажеттіліктеріне жұмсаған.
Сот дәрігерді алаяқтықта кінәлі деп танып, қылмыстардың жиынтығын ескере отырып, бас бостандығынан айыруға үкім шығарды. Материалдық залал жәбірленушілердің пайдасына өндірілді. Үкім заңды күшіне енді.
Елорда прокуратурасы мүгедектікті ресімдеуді қоса алғанда, әлеуметтік қызметтерді алу тек уәкілетті органдарға ресми өтініш беру арқылы ғана мүмкін екенін ескертті.
Еске сала кетейік, бұған дейін Ақмола облысының Атбасар аудандық сотында қызмет бабын пайдаланып алаяқтық жасады деп айыпталған дәрігерге үкім шығарылған болатын. Іске қатысты адам кепілдендірілген тегін медициналық көмек (КТМК) шеңберінде пациентке Астана қалалық №2 ауруханасында қажетті көмек көрсетілуі мүмкін екенін білген.
Осыған қарамастан, ол науқастың туысына «кардиохирургтен емделу» үшін 1,5 млн теңге төлеуді ұсынған. Алайда іске қатысты адамның дәрігерлермен ешқандай келісімі болмаған.