Антикор «Бизнеске жол» жобасы іске қосылғаннан бері 600-ден астам проблемалық кейсті шешіп, 30 мыңға жуық кәсіпкерге көмек көрсетті.
Ведомствоның баспасөз қызметінің мәліметінше, проблемалардың ең көп саны жер қатынастары, салық салу, мемлекеттік сатып алу және инфрақұрылымға қосылу салаларында анықталды.
Мысалы, Ақтөбе облысында монополист «Aqtobe su-energy group» АҚ кәсіпкерлерден өз электр қондырғыларын бірлесіп пайдалану туралы келісім жасасуды талап етті.
Келісімшарт бойынша 45 кәсіпкер ай сайын «Aqtobe su-energy group» компаниясына 50 мың теңгеден (жалпы сомасы 2,2 млн теңге) төлеуге міндетті болды. Әйтпесе, монополист электр қуатын өшіремін деп қорқытты. Нәтижесінде, Ақтөбе облысының Антикорының ұсынысы бойынша негізсіз міндеттемелер алынып тасталды.
Басқа бір жағдайда, Антикор Астана мемлекеттік кірістер департаментінің жанама салықтарды әкімшілендіру басқармасының аудит бөлімінің басшысын әшкереледі. Ол кәсіпкерден 36 млн теңгеге ҚҚС қайтару бойынша оң шешім қабылдау үшін 3,6 млн теңге көлемінде пара талап етті деген күдікке ілінді. Ақшаны алғаннан кейін ол қолма-қол ұсталып, қамауға алынды.
Сонымен қатар, Антикор «Қазтеміртранс» АҚ (Қазақстан Темір Жолы еншілес кәсіпорны) Ақмола және Қарағанды филиалдары басшыларының баюының сыбайлас жемқорлық схемасын анықтады. Олар кәсіпкерлерден вагондарды кедергісіз және жеделдетіп беру үшін жүйелі түрде пара алып тұрған. Нәтижесінде, сот оларды кінәлі деп танып, 7 жыл бас бостандығынан айыруға үкім шығарды.