Пойызбен «Алматы-2» станциясына келген 50-ден астам адам, оның ішінде балалар да табиғи газбен уланды. Анықталғандай, вагондарды киностудия түсірілім үшін берген.
Centralmedia24.kz мәліметінше, Алматы денсаулық сақтау басқармасы оқиға орнына 13 жедел жәрдем бригадасы жіберілгенін хабарлады.
Барлығы 52 адам зардап шекті. Он бала ауруханаға жатқызылды, оның екеуі реанимацияда, қалғандары бейінді бөлімшелерде. Қалған зардап шеккендер тексеруден өтіп, көмек көрсетілгеннен кейін амбулаториялық емдеуге жіберілді.
«Қазақстан темір жолы» (КТЖ) АҚ бұл оқиғаға қатысы жоқ екенін мәлімдеді.
«Улану болған пойыз «Жолаушылар тасымалы» АҚ-на қатысы жоқ және жеке тасымалдаушыға тиесілі. Вагондар киностудияға түсірілім өткізу үшін берілген», – деп атап өтті компанияда.
Кейінірек белгілі болғандай, пойызда Оңтүстік Кореяның «ROAD» сериалының түсірілімі өткен. Хабарланғандай, түсіру тобына вагондарды «Мобил Транс Мед» ЖШС бөлген. Газдың ағу себептері мен оқиғаның мән-жайы анықталуда.
Өз кезегінде Tengrinews.kz үш сағатқа жуық созылған түсірілім процесі суық вагонда өткенін хабарлайды. Жылы киімге қарамастан, көптеген қатысушылар тоңды.
Куәгердің айтуынша, түсірілімнен кейін топты басқа да мұздаған вагонға ауыстырған. Адамдар жылу талап ете бастағанда, ұйымдастырушылар газ оттығын қойған. Ер адамның сөзіне қарағанда, біраз уақыттан кейін балалардың арасында алғашқы естен танулар басталған.