Қазақстанға Біріккен Араб Әмірліктерінен (БАӘ) ірі көлемдегі алаяқтыққа күдікті адам экстрадицияланды.
Бас прокуратура баспасөз қызметінің мәліметінше, 2010 жылғы қазанда қылмыскер АҚШ-тан «Роллс-Ройс» маркалы автокөлікті жеткізу үшін жәбірленушіден 50 млн теңге алып, содан кейін жасырынып кеткен.
Осыған байланысты оған қатысты қылмыстық іс қозғалып, халықаралық іздеу жарияланған. Күдікті құқық қорғау органдарынан 10 жылдан астам жасырынып жүрген.
Осы қылмысты жасағаны үшін оған мүлкі тәркіленіп, 3 жылдан 7 жылға дейін бас бостандығынан айыру жазасы қауіп төніп тұр.
«Іздеудегі адамды экстрадициялау 2009 жылғы Қазақстан Республикасы мен Біріккен Араб Әмірліктері арасындағы қылмыскерлерді беру туралы келісімнің арқасында мүмкін болды, оның әзірлеушісі Қазақстан Республикасының Бас прокуратурасы болды», - делінген хабарламада.