Ақтөбе облысының прокуратурасы Әйтеке би ауданындағы «Щербаковское» бөгетінде бөгеттің жарылу фактісі бойынша қылмыстық іс қозғалғанын хабарлады.
Ведомствоның баспасөз қызметінің мәліметінше, бөгет 30 наурызда жарылған. Су басу қаупіне байланысты жергілікті билік Жүргенов ауылынан 927 адамды, оның ішінде 215 баланы эвакуациялады.
Сонымен қатар, бөгеттің жарылуы салдарынан Ырғыз өзенінің жайылмасы арнасынан шықты. Нәтижесінде су 78 үй ауласын басып, 10 үй қирады. Электр және газбен жабдықтау желілері зақымдалып, ауыл жарықсыз, сусыз және газсыз қалды.
Жарылған бөгет «Ақтөбе облысының табиғи ресурстар және табиғат пайдалануды реттеу басқармасы» ММ балансында екені хабарланады.
Белгілі болғандай, 2023 жылы мердігер - «СК Гранд Канал» өндірістік кооперативі бөгетті жөндеп, нысанды облыстық табиғи ресурстар басқармасына пайдалануға тапсырған.
«Су тасқыны кезеңінде тапсырыс беруші қабылдап, мердігер тапсырған нысан өзінің негізгі қызметін атқармады, бұл Т.Жүргенов ауылы тұрғындарының, сондай-ақ ұйымдарының құқықтары мен заңды мүдделеріне елеулі зиян келтіруге әкеп соқты. Жоғарыда аталған мән-жайларды ескере отырып, Ақтөбе облысы Әйтеке би ауданының прокуратурасы ҚР ҚК-нің 371-бабының 1-бөлігі бойынша (немқұрайлылық) БТТР-ге қылмыстық іс тіркеу туралы шешім қабылдады», - делінген хабарламада.
Қылмыстық іс Ақтөбе облысының Сыбайлас жемқорлыққа қарсы іс-қимыл агенттігінің департаментіне жіберілді.