Ақтөбе қалалық сотында алаяқтыққа күдіктелген емші Сұлушаш Қазбаеваның ісі бойынша пікірталастар өтті. Айыптау мәліметтері бойынша, оның әрекеттерінен 136 адам зардап шекті, жалпы шығын 579 млн теңгені құрады.
«Қазинформ» ХАА хабарлағандай, әйел өзіне көмек сұрап жүгінген азаматтарды Ақтөбе облысы Әйтекеби ауданы Ақкөл ауылындағы мешіттің құрылысына, банкет залын салуға, қызын Түркияда емдетуге, сондай-ақ жеке клиника ашуға және бизнесті дамытуға несие рәсімдеуге көндірген.
Алдымен зардап шеккендер саны 90 адамды құраған, бірақ процесс барысында іске тағы бірнеше азамат қосылды.
Зардап шеккендер 1 млн теңгеден 24 млн теңгеге дейін несие алып, оны өз бетінше төлеп жатыр.
Қазбаева кінәсін мойындамай, ақшаны оған ерікті түрде бергенін мәлімдеді. Алайда төрт айлық сот тергеуі барысында айыпталушы қаражаттың қайда жұмсалғанын түсіндіре алмады.
«Осы сомаларға қатысты сұрақтарға ол жауап беруден бас тартты. Қазіргі уақытта 579 миллион теңгеден астам ақшаның қайда кеткені белгісіз», – деді прокурор.
Мемлекеттік айыптау Сұлушаш Қазбаеваға 6 жыл 8 ай бас бостандығынан айыру жазасын, сондай-ақ зардап шеккендердің пайдасына шығынды өндіруді сұрады. Сот пікірталастары жалғасуда.