Ақтөбе қаласындағы Кеңес Нөкин тұрғын алабында орналасқан мектепте қазан айының басынан бері жылыту жоқ. Ата-аналардың хабарлауынша, балалар сабақта курткамен отыруға мәжбүр, ал сабақтар 30 минутқа дейін қысқартылған.
«Диапазон» басылымының мәліметінше, аналардың бірі бұл жағдай жылдан жылға қайталанып келе жатқанын айтады.
«Ғимаратта суық, қабырғалар суып кеткен. Балалар ауырып жатыр, менің балам ауруханада. Директор жұмыстан кетті, міндетін атқарушы әлі қызметіне кіріскен жоқ, сұрайтын ешкім жоқ. Жылыту жоқ, себебі барлық қазандық істен шыққан. Қалалық білім бөлімі біледі, бірақ ешқандай шара қолданбайды. Мен өзім 25 жыл бұрын осы мектепте оқыдым және мен де сабақта курткамен отырдым», – делінген хабарламада.
Ата-аналар күрделі жөндеуге қаражат бөлінгеніне қарамастан, ғимараттың қанағаттанарлықсыз күйде қалып отырғанын атап өтеді.
«Жыл сайын бір жағдай. Мектепті күрделі жөндеуге ақша бөлінді, нәтижесі – жөндеу жоқ, тек көзді бояды. Спортзалды жыл сайын жасайды, жыл сайын еденді жұлып тастайды, оқу жылының ортасында бояйды, ал балалар осымен дем алады. Директор 1 қазанда өз еркімен жұмыстан кетті, ешкімге ескертпей. Өзінен кейін ешкімді қалдырмай», — деп жазады аналардың бірі.
Білім басқармасы ғимаратқа күрделі жөндеу 2022 жылы жүргізілгенін хабарлады. Сонда мектепте шатыр ауыстырылып, қасбеті жаңартылып, жаңа есіктер мен линолеум орнатылып, жертөле мен аумақ жөнделген. Ағымдағы жылы қосымша спорт залына жөндеу жүргізілген.
Сонымен қатар, ведомство мектепке негізгі қазандық істен шыққандықтан, жаңа жылыту қазандығы сатып алынғанын түсіндірді. Қазіргі уақытта оны орнату жұмыстары жүргізілуде.
Сондай-ақ, 6 қазаннан бастап мектеп директорының міндетін уақытша Мирамгүл Ізбағамбетова атқаратыны нақтыланады.