Правительство жылу желілерін салу мен қайта жаңартуға 9 млрд теңге бөлуді жоспарлап отыр Павлодар, Екібастұз және Ақсуда.
Ведомство баспасөз қызметінің мәліметінше, Павлодарда ұзындығы 2,5 км болатын ТМ-13 жылу магистралін салу жоспарланған, бұл 41,5 мың адам тұратын тұрғын үйлерді тұрақты жылумен қамтамасыз етуге мүмкіндік береді. Оған 3,6 млрд теңге бөлуді көздеп отыр.
Екібастұзда жалпы ұзындығы 4 км дерлік болатын ТМ-1 және ТМ-3 жылу магистральдарының учаскелерін қайта жаңарту жүргізуге ниетті. Жөндеу жұмыстары 3,6 млрд теңгеге түседі.
Қалған 1,8 млрд теңге Ақсудағы ұзындығы 4,3 км болатын кварталішілік жылу желілерін қайта жаңартуға жұмсалады.
«Соңғы 2 жылда осы учаскелерде 40-тан астам жарылыс болды. Қайта жаңарту 1,5 мыңнан астам жергілікті тұрғынды сапалы жылумен қамтамасыз етуге мүмкіндік береді», - делінген хабарламада.
Павлодар облысы әкімдігінің дерегінше, бүгінгі таңда Павлодарда жылумен жабдықтау желілерінің ұзындығы 828,1 км (орташа тозуы – 82,8%), Екібастұзда – 422,5 км (90,7%), Ақсуда – 99,1 км (59%) құрайды.
«Техникалық тексеру нәтижелері бойынша шұғыл жұмыстар үшін тозу деңгейі ең жоғары 4 учаске анықталды», - деді әкімдікте.
Еске салайық, бұған дейін үкімет резервтен Кентау, Риддер және Қызылорда жылу көздерін қайта жаңарту мен күрделі жөндеуге 16 млрд теңгеге жуық бөлген еді.