Прокурорлар Павлодар облысында «Ауыл – Ел бесігі» мемлекеттік бағдарламасын іске асыру кезінде бұзушылықтарды анықтады.
Ведомствоның баспасөз қызметінің мәліметінше, Ақсу құрылыс бөлімі «Ауыл - Ел бесігі» мемлекеттік бағдарламасы аясында салынып жатқан нысандар үшін негізсіз шамамен 500 млн теңге аударған.
Тапсырыс беруші мердігерге 5 спорттық-сауықтыру кешенінің құрылысы бойынша орындалмаған жұмыстар үшін алдын ала ақша төлегені хабарланады. Бұл ретте жұмыстар кестеден 5 айға артта қалумен жүргізілген.
«Қадағалау актісі бойынша Ақсу қаласының әкімдігі артық төленген бюджет қаражатын қайтару бойынша талап-шағым жұмысын жүргізуде, бүгінгі таңда мемлекетке 60 млн теңге қайтарылды», - делінген хабарламада.
Белгілі болғандай, жіберілген бұзушылықтар үшін Ақсу әкімінің орынбасары тәртіптік жазаға тартылды. Құрылыс бөлімінің басшысын Әдеп жөніндегі кеңес «мемлекеттік қызметті беделін түсіретін тәртіптік теріс қылық жасағаны үшін жұмыстан шығаруды ұсынады».