2024-2026 жылдарға арналған сейсмологиялық зерттеулердің ғылыми жобасына 1,5 млрд теңге бөлу жоспарлануда.
«Қазинформ» ХАА мәліметінше, ҚР ғылым және жоғары білім министрлігі жыл басында «Ұлттық сейсмологиялық бақылаулар мен зерттеулер ғылыми орталығы» ғылыми-техникалық қызмет субъектісі ретінде 5 жылға аккредиттелгенін хабарлады.
«Ғылым министрлігі 2024-2026 жылдарға жариялаған конкурста бағдарламалық-нысаналы қаржыландыру аясында "Қазақстан өңірлері мен қалаларының сейсмикалық қаупін заманауи ғылыми-әдістемелік негізде бағалау" ғылыми-техникалық тапсырмасы қатысады», - деп түсіндірді ведомство.
2025 жылдан бастап ғылым министрлігінде Ұлттық сейсмологиялық бақылаулар ғылыми орталығының ғылыми-техникалық бағдарламаларын қаржыландыру тәсілдері қарастырылатыны хабарланды.
«Президент Қасым-Жомарт Тоқаевтың тапсырмасы бойынша Алматы қаласы әкімдігінің қолдауымен 2024 жылға жабдықтарды жаңғыртуға 500 миллион теңге бөлінді, сондай-ақ 2024-2026 жылдарға арналған сейсмологиялық зерттеулер бағыты бойынша ғылыми-техникалық жобаны қаржыландыру жоспарлануда. Жобаның құны 1,5 миллиард теңгені құрайды», - делінген хабарламада.
Сонымен қатар, ведомство сейсмологиялық бақылаулар ғылыми орталығы ғимаратын күрделі жөндеу жүргізу жобасын дайындап жатқаны белгілі болды.
Еске сала кетейік, жыл басында Алматыдан 264 км қашықтықта магнитудасы 6,7 балл болатын жер сілкінісі болды . Сол кезде сезімталдық 5 балл деп бағаланды. Кейін қайталама дүмпулер де тіркелді.
Жер сілкінісінен кейін қала тұрғындарының Алматы билігіне көптеген сұрақтары туындады. Мысалы, мегаполис тұрғындары ТЖ кезінде халықты ескерту жүйесінің неге іске қосылмағанына таң қалды.
Сол кезде Алматы ТЖД бастығы Нұрлан Атығаев «сереналар тек 5,5 баллдан жоғары жер сілкіністері тіркелгенде ғана іске қосылады», ал оның айтуынша, сол сәтте амплитуда небәрі 4-5 баллды құрағанын хабарлады.
Сонымен қатар, оңтүстік астана тұрғындары жер сілкінісі туралы SMS хабарландыруларының уақытында келмегеніне шағымданды. ТЖД оларға ұялы байланыс операторлары ақпаратты өңдеуге үлгермейтінін, сәйкесінше жедел ақпарат кешігіп жететінін хабарлады.
Сейсмикалық қауіпсіздік мәселелері жөніндегі кеңесте Президент Тоқаев уәкілетті ведомстволардың жұмысын сынға алып, Сыбайлас жемқорлыққа қарсы қызметке Бас прокуратурамен бірлесіп, ескерту жүйесіне бөлінген бюджет қаражатының нақты неге жұмсалғанын анықтауды тапсырды. Айта кетейік, кейін төтенше жағдайлар министрі Сырым Шәріпханов қызметінен босатылды.