Көлік министрлігі «Ашық НҚА» порталында республикалық маңызы бар «Балқаш – Бурылбайтал» жол учаскесінде ақылы жол жүруін енгізу туралы бұйрық жобасын жариялады. Қоғамдық талқылау 9 қыркүйекке дейін жалғасады.
Жобаға түсіндірме жазбада көрсетілгендей, бұл елдің көліктік-логистикалық әлеуетін жетілдіру мақсатында жасалуда.
Қаражатты жолдарды жөндеуге және күтіп-ұстауға, сондай-ақ ақылы трассаларға қызмет көрсету үшін қажетті техниканы сатып алуға пайдалану жоспарлануда.
Еске сала кетейік, 2022 жылы бұрынғы индустрия және инфрақұрылымдық даму министрі Қайырбек Өскенбаев хабарлағандай, екінші санаттағы 2,5 мың км автожолдарды қалыпты жағдайға келтіргеннен кейін ақылы ету жоспарланған.
Сол кезде келесі учаскелерді ақылы ету жоспарланған: Қызылорда — Арал, Ақтөбе — Орал, Ақтөбе — Орынбор, Қайнар — Бішкек, Жетібай — Шетпе — Бейнеу — Ақжигіт, Павлодар — Семей, Астананы солтүстік айналып өту жолы, Орал — Саратов, Көкшетау — Петропавл, Астана — Атбасар, Павлодар — Омбы, Семей — Қалбатау.
2023 жылы 8 қазаннан 1 желтоқсанға дейінгі кезеңде олардың бір бөлігі, атап айтқанда: «Бейнеу-Ақжигіт», «Павлодар-Омбы», «Көкшетау-Петропавл» және «Орал-Саратов» автожолдары ақылы негізде жұмыс істей бастады.
Сонымен қатар, өткен жылдың қыркүйегінде көлік министрлігі хабарлағандай, «ҚазАвтоЖол» ҰК» АҚ республикалық маңызы бар автомобиль жолдарымен жүру ақысын алу жүйесін орнату және қызмет көрсету бойынша «Computer Vision Technologies» ЖШС-мен келісімшартты қайта қарайды. Ведомство сол кезде операциялық шығындар үшін төлемдердің мөлшерін қысқарту ниетін мәлімдеді.