Жамбыл облысы Қордай ауданы Қаракемер ауылының тұрғындары кәмелетке толмағандардың қатысуымен болған бірнеше қайғылы оқиғадан кейін алаңдаушылық білдіруде. Бұған дейін жасөспірімдердің қазасы туралы хабарланған болатын, алдын ала себеп ретінде суицид аталды.
НЕ БОЛДЫ
Жамбыл облысы полиция департаментінің (ПД) мәліметінше, 15 сәуір күні Қаракемер ауылында екі кәмелетке толмаған баланың денелері табылды.
Nege.kz хабарлағандай, жасөспірімдер 9-сынып оқушылары болып, бір мектепте оқыған. Қайғылы оқиғаның алдында оқушылар TikTok әлеуметтік желісіне «Естелік» деген жазумен сурет жариялаған.
АУЫЛ ТҰРҒЫНДАРЫ НЕ АЙТТЫ
Ауыл тұрғынының айтуынша, бұл соңғы айлардағы алғашқы мұндай оқиға емес.
«Желтоқсан айынан бері ауылымызға қандай да бір індет келді. Алдымен тоғызыншы сынып оқушысы асылып қалды, кейін жетінші сынып оқушысы. Бұл оқиғалардан әрең айықпай жатып, тоғызыншы сыныптан кейін колледжге түскен жасөспірімнің қайтыс болғаны туралы қайғылы хабар келді. Соңғы екі оқиғаны есептесек, барлығы бес болды», – деді ол.
Тұрғындар болып жатқан оқиға ата-аналар арасында алаңдаушылық тудыратынын атап өтеді. Олардың айтуынша, отбасылар балаларын бақылауды күшейтіп, мамандардан көмек сұраған.
«Біздің бар үмітіміз – Тараздан балаларға насихат айтуға келетін имамдарда. Мүмкін, осыдан кейін бұл зұлымдық тоқтар», – деді ата-аналардың бірі.
Ресми органдар бұл оқиғалардың өзара байланысты ма және олар бір тергеу аясында қарастырыла ма, әзірге хабарламай отыр.