Президент Қасым-Жомарт Тоқаев «Қазақстан Республикасы Қауіпсіздік Кеңесі Аппаратының кейбір мәселелері және Қазақстан Республикасы Президентінің кейбір актілеріне өзгерістер мен толықтырулар енгізу туралы» Жарлыққа қол қойды. Құжат Қауіпсіздік Кеңесі және оның Аппараты туралы ережелерді бекітті.
ҚАУІПСІЗДІК КЕҢЕСІНЕ ҚАНДАЙ МІНДЕТТЕР БЕКІТІЛДІ
Қауіпсіздік Кеңесі және оның Аппараты жаһандық қауіптер мен сын-қатерлерді, сондай-ақ ішкі жағдайдың өзекті аспектілерін жан-жақты талдаумен айналысады.
Жұмыстың жеке бағыты ұлттық қауіпсіздік саласындағы тәуекелдерді бақылауға, мемлекеттік басқарудың тұрақтылығына және төраға мен Қауіпсіздік Кеңесінің шешімдерін орындауға байланысты.
ТӨРАҒА ОРЫНБАСАРЫ ҚАНДАЙ ӨКІЛЕТТІКТЕРГЕ ИЕ БОЛДЫ
Жарлық Қауіпсіздік Кеңесі төрағасы орынбасарының кең өкілеттіктер ауқымын айқындайды. Олардың қатарында — төрағаның актілері мен тапсырмаларын, сондай-ақ Қауіпсіздік Кеңесінің шешімдерін, оның ішінде жедел кеңестерде қабылданған шешімдерді орындауды бақылауды ұйымдастыру.
Төраға орынбасары сондай-ақ ұлттық қауіпсіздік, қорғаныс қабілеттілігі, заңдылық пен құқықтық тәртіп мәселелері бойынша мемлекеттік органдар мен ұйымдардың қызметін үйлестіреді.
АҚПАРАТТЫҚ ЖӘНЕ КИБЕРҚАУІПСІЗДІК ӨКІЛЕТТІКТЕР АУҚЫМЫНА КІРДІ
Құжатта ақпараттық және киберқауіпсіздік мәселелері, оның ішінде жасанды интеллектіні пайдалану арқылы жеке айқындалған. Өкілеттіктер саласына сондай-ақ дербес деректерді қорғау, сыбайлас жемқорлыққа және экономикалық қылмысқа қарсы іс-қимыл, сондай-ақ азаматтық қорғаныс кіреді.
Сонымен қатар, Қауіпсіздік Кеңесі төрағасының орынбасары халықаралық өзара іс-қимылды және Қауіпсіздік Кеңесі Аппаратының қызметін үйлестіреді.
ҚАУІПСІЗДІК КЕҢЕСІНІҢ АППАРАТЫ КІМГЕ БАҒЫНАДЫ
Қауіпсіздік Кеңесінің Аппараты Мемлекет басшысына тікелей бағынатын және есеп беретін дербес мемлекеттік орган ретінде айқындалған.
Оның қызметі ұлттық қауіпсіздік саласындағы тәуекелдерді бақылауды жетілдіруге, мемлекеттік басқарудың тұрақтылығын қамтамасыз етуге және төраға мен Қауіпсіздік Кеңесінің шешімдерін институционалдық қолдауға бағытталған.
ЖАРЛЫҚТЫ ІСКЕ АСЫРУ НЕГЕ БАҒЫТТАЛҒАН
Бекітілген міндеттерді іске асыру ҚР егемендігі мен тәуелсіздігін, аумақтық тұтастығын, елдің халықаралық аренадағы ұлттық мүдделерін және конституциялық құрылыс негіздерін қорғауды күшейтуге бағытталған.
