Панфилово ауылындағы мал сою орнына қатысты мемлекеттік органдардың ресми жауаптары Алматы облысы нысанда қандай бұзушылықтар анықталғанын және қандай шаралар қабылданғанын көрсетті. Сонымен қатар кейбір ведомстволар заңнамада көзделген себептер бойынша тексеру жүргізбегенін хабарлады.
ВЕТЕРИНАРИЯ ОРГАНДАРЫ НЕ ХАБАРЛАДЫ
ФБРК редакциясы Панфилово ауылы тұрғындарының мал сою орнының жұмысына қатысты шағымдары туралы жарияланымнан кейін жіберілген сұрауларға мемлекеттік органдардың ресми жауаптарын алды. Құжаттар тексеру іс-шараларының нәтижелерін және әрбір ведомствоның ұстанымын ашады.
Ауыл шаруашылығы министрлігінің (АШМ) ветеринариялық бақылау және қадағалау комитетінің мәліметінше, Панфилов ауылдық округі әкімі аппаратының аумақтық инспекцияға жоспардан тыс тексеру жүргізу туралы ресми өтініші түспеген.
Бұл ретте комитетте «Жұлдыз» базары аумағындағы сою пунктінің 2024 жылғы 26 маусымда ЖК Н. Қатубаевқа берілген қолданыстағы есептік нөмірі бар екенін хабарлады. Нысанға күнделікті бақылауды жүзеге асыратын мемлекеттік ветеринариялық-санитариялық инспектор бекітілген. Аумақта ветеринариялық-санитариялық сараптама зертханасы да жұмыс істейді.
Сонымен қатар инспекция ветеринариялық-санитариялық талаптардың бұзылуын анықтады. 2026 жылғы 20 шілдеде жалға алушыға бұзушылықтарды жою туралы нұсқама берілді. Ол аумақты санитариялық жағдайға келтіру, қалдықтарды уақтылы шығару, тоңазытқыш жабдықты талаптарға сәйкес келтіру, дезбарьер жұмысын қамтамасыз ету, кәріз жүйесін жабдықтау және өнімге зертханалық зерттеулер жүргізуді көздеді.
2026 жылғы 29 шілдедегі жағдай бойынша нұсқама 75%-ке орындалды. Талаптардың бір бөлігінің орындалмауына байланысты ЖК Н. Қатубаевқа қатысты ҚР ӘКБт-нің 406-бабы 1-бөлігінің 2-тармақшасы бойынша («Ветеринариялық (ветеринариялық-санитариялық) қағидалардың, талаптардың және ветеринариялық нормативтердің сақталмауы») әкімшілік құқықбұзушылық туралы хаттама жасалып, әкімшілік жауапкершілік шаралары қолданылды.
ИНСПЕКТОРЛАР ТАҒЫ ҚАНДАЙ БҰЗУШЫЛЫҚТАРДЫ АНЫҚТАДЫ
2026 жылдың басынан бастап «Жұлдыз» базары аумағында ветеринариялық заңнаманың екі бұзушылығы анықталып, олар бойынша 43 250 теңге көлемінде айыппұл тағайындалды.
Сонымен қатар инспекторлар комитеттің мәліметі бойынша, жалға алынған үй-жайларда ветеринариялық-санитариялық қорытындысыз және нысанның есептік нөмірінсіз жануарлардың ішкі органдарын өңдеген үш субъектіні анықтады. Олар әкімшілік жауапкершілікке тартылды, базар әкімшілігі олармен жалдау шарттарын бұзды, ал 2026 жылғы 31 шілдеде базарды басқаратын «La fattoria» ЖШС де бұзушылықтарды жою туралы нұсқама алды.
САНИТАРИЯЛЫҚ ҚЫЗМЕТ ТЕКСЕРУДІ НЕГЕ ЖҮРГІЗБЕДІ
Талғар аудандық санитариялық-эпидемиологиялық бақылау басқармасының мәліметінше, сою пункттері мемлекеттік санитариялық-эпидемиологиялық бақылауға жататын нысандар тізбесіне кірмейді, сондықтан нысанды тексеру және өтініш бойынша жоспардан тыс тексеру жүргізілмеген.
Ведомство сондай-ақ тәулігіне 10-нан 30 тоннаға дейін ет өндіретін сою пункттері үшін санитариялық аралық 300 метрді құрайтынын, алайда тұрғын үйлерге дейінгі нақты қашықтықты анықтай алмайтынын көрсетті, өйткені бұл уәкілетті органның құзыретіне жатады. Сонымен қатар мұндай нысандарға санитариялық-эпидемиологиялық қорытынды берілмейді.
ЭКОЛОГТАР МЕН ПРОКУРАТУРА НЕ ДЕДІ
Алматы облысының экология департаменті өтініш бойынша мемлекеттік экологиялық бақылау жүргізілмегенін хабарлады. Сондай-ақ ведомство атмосфералық ауа сапасын бағалау және жағымсыз иістердің әсері санитариялық-эпидемиологиялық бақылау органдарының құзыретіне жататынын атап өтті.
Өз кезегінде Талғар ауданының прокуратурасы да көрсетілген кезеңде мал сою орнының қызметіне тексеру жүргізбегенін хабарлады. Прокуратураның мәліметінше, азаматтардың өтініштері уәкілетті органдарға жолданған, өйткені прокуратура органдары басқа мемлекеттік органдардың функцияларын алмастырмайды.
