Алматы филиалы «Азаматтарға арналған үкімет» Мемлекеттік корпорациясы КЕАҚ кадастрлық картада көрсетілген, №17 мектеп-интернатының жер телімінің құқық иеленушілерінің бірі «Bona Fide Contract» ЖШС болып табылады деген деректерді жоққа шығарады. Қаланың Жер ресурстарын басқару департаменті бұл уақытта қандай телім туралы сөз болып жатқанын білмейді де.
Бұған дейін біз жазғанбыз, Алматыдағы №17 мектеп-интернаты орналасқан жер телімі ортақ үлестік меншікте екенін және жалпы мақсатты тағайындалуы – «жер асты гаражын пайдалану және қызмет көрсету үшін». Бұл ретте мектеп-интернат телім аумағының шамамен 90%-ын алып жатыр.
«Бірыңғай мемлекеттік жылжымайтын мүлік кадастры» (БММК АЖ) ақпараттық жүйесінің жария кадастрлық картасының деректері бойынша, телім кондоминиумда орналасқан, оған сәйкес құқық иеленушілер болып «№17 мектеп-интернаты» КММ және «Bona Fide Contract» ЖШС табылады.
Біз Алматы қ. әкімдігіне және Жер ресурстарын басқару комитетіне (ЖРБК) ресми сұраулар жолдап, жер телімінің меншік иелері мен құқық иеленушілерін тіркеудің заңдылығын тексеруді және телімде мектеп-интернат орналасқанын ескере отырып, жоғарыда аталған телімнің мақсатты тағайындалуының қаншалықты заңды екенін түсіндіруді өтіндік.
Алматы қ. әкімдігі біздің өтінішімізді «Азаматтарға арналған үкімет» Мемлекеттік корпорациясы» КЕАҚ филиалына, ал ЖРБК – Алматы қаласының Жер ресурстарын басқару департаментіне қайта бағыттады.
«Азаматтарға арналған үкімет» мемлекеттік корпорациясы жер телімінің кадастрлық мәліметтерін зерделегенін және телімнің меншік иелері №17 мектеп-интернаты және белгісіз «Медеу-Сервис» ЖШС екенін хабарлады. Сондай-ақ бізге үлестер жер телімін пайдалану туралы белгілі бір келісіммен бөлінгені және қазір телім жеке тұлғаларға ресімделгені айтылды.
Бұл жауап бізді қанағаттандырмады. Біз мемлекеттік корпорация филиалына қайта жүгініп, жер телімін пайдалану субъектілерінің бірі ретінде «Медеу-Сервис» ЖШС қандай мәліметтер негізінде тіркелгенін және БММК АЖ деректерінде неліктен басқа құқық иеленуші – «Bona Fide Contract» ЖШС көрсетілгенін хабарлауды сұрадық.
Сонымен қатар, біз жауапта айтылған келісімнің мәліметтерін ұсынуды және «Азаматтарға арналған үкімет» хабарлағандай, телім №17 мектеп-интернатына және «Медеу-Сервис» ЖШС-не бекітілген болса, неліктен жеке тұлғалардың жер теліміне қатысы барын түсіндіруді өтіндік.
Мемлекеттік корпорация бізге тағы да №17 мектеп-интернаты орналасқан телімге «Bona Fide Contract» ЖШС-нің қатысы жоқтығын мәлімдеп, әкімдік «Медеу-Сервис» ЖШС-не жер телімінің үлесін 1999 жылы бергенін, ал мектеп-интернат үлесті тек 2009 жылы алғанын атап өтті.
Мемлекеттік корпорацияның деректері бойынша, «Медеу-Сервис» ЖШС телімі жер асты гаражын пайдалану және қызмет көрсету үшін арналған және кейіннен құқықтар жеке тұлғаларға берілген. Бәлкім, тұрақ орындарының меншік иелеріне. Алайда біз «Медеу-Сервис» ЖШС таратылғанын анықтадық.
Неліктен таратылған компания әрекет ететін тұрақ орналасқан телімнің меншік иесі болып қалатыны жұмбақ болып қалуда. Сонымен қатар, БММК АЖ-де неліктен телімнің құқық иеленушісі ретінде «Bona Fide Contract» ЖШС тіркелгені және мемлекеттік корпорация бұл деректерді қалай байқамай қалғаны әлі де белгісіз.
Алматы қ. ЖРБД бұл уақытта мемлекеттік корпорацияның деректеріне сілтеме жасайды. Ең қызығы, департамент жауабында №17 мектеп-интернатына қатысы жоқ мүлде басқа телімнің кадастрлық нөмірін көрсетеді.
Мемлекеттік органдардың жауаптары мен қолжетімді деректерді талдай келе, «Азаматтарға арналған үкімет» мемлекеттік корпорациясында да, Алматы қ. ЖРБД-да да осы жер телімі туралы мәліметтер тиісінше тексерілмеген, ал департамент тіпті жағдайды түсінуге мүдделі емес сияқты әсер қалдырады.