Қазақстанда банктер алаяқтардың әрекетінен немесе ауыр өмірлік жағдайға байланысты үмітсіз несиелерін есептен шығарған азаматтарды жеке табыс салығынан (ЖТС) толық босату ұсынылды. Бастаманы Премьер-Министрдің орынбасары – ұлттық экономика министрі Серік Жұманғариннің төрағалығымен өткен Салық кодексін енгізу жөніндегі жобалық кеңсенің отырысында талқыланды.
НЕГЕ ҚАРЫЗДЫ ЕСЕПТЕН ШЫҒАРҒАННАН КЕЙІН САЛЫҚ ПАЙДА БОЛАДЫ
Қаржы нарығын реттеу және дамыту агенттігі (ҚРДА) мен Қазақстан қаржыгерлері қауымдастығының өкілдері алаяқтардың әрекеттері салдарынан ресімделген қарыздарды қоса алғанда, үмітсіз несиелерді есептен шығару кезінде ЖТС-тан толық босатуды сақтап қалуды ұсынды.
Қолданыстағы Салық кодексіне сәйкес банк есептен шығарған берешек қарыз алушының кірісі деп танылады. Сондықтан несие кешірілгеннен кейін азаматта ЖТС төлеу міндеттемесі туындауы мүмкін. Салықтан босату жекелеген жағдайлар үшін қазірдің өзінде көзделген.
КІМДІ ЖТС-ТАН БОСАТУ ҰСЫНЫЛЫП ОТЫР
Отырыста Серік Жұманғарин өз кінәсінен емес, несиеге қызмет көрсету мүмкіндігінен айырылған азаматтарды босатуды қолдады. Бұл санатқа алаяқтардың әрекеттерінен зардап шеккен адамдарды, сондай-ақ шынымен ауыр өмірлік жағдайға тап болған қарыз алушыларды қосу ұсынылады.
Бұл ретте жеңілдікті кез келген берешекті есептен шығаруға тарату ұсынылмайды. Вице-премьердің айтуынша, егер банк өз балансын оңтайландыру және провизияларды қайта қалыптастыру үшін коммерциялық несиені есептен шығарса, бюджет салықтық түсімдерді автоматты түрде жоғалтпауы керек.
АУЫР ЖАҒДАЙДЫҢ ҚАНДАЙ КРИТЕРИЙЛЕРІ ТАЛҚЫЛАНУДА
Уәкілетті мемлекеттік органдар ҚРДА-мен бірлесіп, қарыз алушыны ауыр өмірлік жағдайға тап болғандар қатарына жатқызуға болатын критерийлердің толық тізбесін айқындауы қажет.
Отырыста ықтимал негіздердің қатарында мүгедектік, еңбекке қабілеттілігін жоғалту, мүлік пен кірістің болмауы аталды. Сондай-ақ мамандар есептеулер жүргізіп, келесі отырысқа келісілген ұстаным дайындауы тиіс.
