Каспийде 14 әскери қызметші қаза тапқаннан кейін «Әділет» фракциясының депутаты Аббат Орысбаев оқу-жаттығуға қатысушыларды GPS-белгілермен және денсаулық датчиктерімен жабдықтауды ұсынды. Бастама сондай-ақ дрондар арқылы аумақты бақылауды және оқу-жаттығудың қауіпті кезеңдерін дереу тоқтату мүмкіндігін қарастырады.
ҚАНДАЙ ҚҰРЫЛҒЫЛАРДЫ ЕНГІЗУ ҰСЫНЫЛДЫ
Депутаттың айтуынша, әскери қызметшілердің қауіпсіздігін арттыру үшін оқу-жаттығуға қатысушылардың координаттарын нақты уақыт режимінде беретін электрондық құрылғыларды пайдалану қажет.
Белгілер әскери қызметші құлаған, ұзақ қозғалмаған немесе суға түсіп кеткен жағдайда автоматты түрде SOS сигналын жіберуі тиіс. Сонымен қатар, ұшқышсыз ұшу аппараттары арқылы оқу-жаттығу аумағын үнемі бақылау ұсынылады.
ӘСКЕРИЛЕРДІҢ ЖАЙ-КҮЙІН ҚАЛАЙ БАҚЫЛАУ ҰСЫНЫЛАДЫ
Жеке ұсыныс әскери қызметшілердің физиологиялық жай-күйін мониторингтеуге қатысты. Құрылғылар жүрек соғу жиілігін және басқа да негізгі денсаулық көрсеткіштерін қадағалауы тиіс.
Сонымен қатар, командалық пунктке ауа райы, көріну, жел жылдамдығы және теңіз жай-күйі туралы мәліметтерді беру ұсынылады. Егер тәуекел деңгейі тым жоғары болса, оқу-жаттығудың қауіпті кезеңін дереу тоқтату ұсынылады.
ҚАНДАЙ ҚОСЫМША ШАРАЛАР ҚАРАСТЫРЫЛҒАН
Депутат сондай-ақ әрбір оқу-жаттығу үшін алдын ала қауіпсіздік жоспарын әзірлеуді ұсынды. Құжатта қатысушылардың денсаулық жағдайына қойылатын талаптар, ықтимал тәуекелдер, эвакуациялау маршруттары, құтқару тобының құрамы және ауа райы шектеулері көрсетілуі тиіс.
Бұдан басқа, оқу-жаттығу өткізілетін орындарды алдын ала тексеру ұсынылады. Үкіметке үш ай ішінде бірыңғай қауіпсіздік стандартын әзірлеу және оны бастапқыда жекелеген өңірлерде сынақтан өткізу ұсынылды.
КОНТЕКСТ
Еске салайық, 24 қыркүйекте Маңғыстау облысындағы Каспий теңізінің жағалауында өткен оқу-жаттығу кезінде ауа райының күрт нашарлауы және желдің күшеюі салдарынан 17 әскери қызметшіні теңізге алып кетті. Оқиға салдарынан 14 адам қаза тапты.
Іздеу-құтқару операциясы 25 қыркүйекте таңертең соңғы екі жоғалған әскери қызметшінің денесі табылғаннан кейін аяқталды.
Қорғаныс министрлігі жүйесінің бес лауазымды тұлғасы қызметке немқұрайлы қарауға және ауыр зардаптарға әкеп соққан кеме жүргізу ережелерін бұзуға байланысты қылмыстық құқық бұзушылықтар жасады деген күдікпен ұсталды. Олардың қатарында — Қарулы Күштердің Әскери-теңіз күштері бас қолбасшысының бірінші орынбасары – штаб бастығы, екі әскери бөлім командирі, теңіз жаяу әскері ротасының командирі және катер командирі бар.
