FIFA «FIFA Forward Enterprise» жобасын дайындау кезінде жіберілген қателіктерді мойындап, ұлттық футбол федерацияларынан кешірім сұрады. Бұл туралы тиісті мәлімдеме Рабат қаласындағы кездесудің қорытындысы бойынша айтылды.
ЖОБАНЫҢ МӘНІ НЕДЕ
FIFA деректері бойынша, FIFA Forward Enterprise жобасы коммерциялық құқықтарды және әлем чемпионаттарын қоса алғанда, турнирлерді өткізуді басқаратын жеке компания құруды көздеген, деп хабарлайды халықаралық агенттік Reuters.
Миноритарлық үлесті жеке инвесторларға сатудан $4,2 млрд-қа дейін табыс түседі деп жоспарланған. Бұл қаражат футболды дамытуға және 211 ұлттық футбол федерациясын қаржыландыруға жұмсалмақ болған.
ЖОБА НЕЛІКТЕН СЫНҒА ҰШЫРАДЫ
Жоба UEFA және басқа да футбол ұйымдары тарапынан сынға ұшырады.
UEFA «футболдың жаны сатылатын активке айналмауы керек» деп мәлімдеді, сондай-ақ FIFA бастаманы ұлттық және аймақтық федерациялармен жеткілікті талқылаусыз әзірлегенін атап өтті.
Наразылықтардан кейін жоба тоқтатылды.
FIFA-ДА НЕ АЙТТЫ
Рабаттағы кездесу қорытындысы бойынша FIFA басшылығы бастаманы дайындау кезінде қателіктер жіберілгенін мойындады.
«Жобаны дайындау кезінде қателіктер жіберілгенін мойындаймыз. Процесс басқаша ұйымдастырылуы керек еді, ал FIFA Кеңесі мен ұлттық федерациялар талқылаудан шеттетілгендей сезімде болмауы тиіс еді. Жоба туралы ақпарат БАҚ-қа тарағаннан кейін де қателіктер жіберілді», — делінген ұйымның мәлімдемесінде.
FIFA сондай-ақ барлық әрекеттер ішкі ережелер шеңберінде жүзеге асырылғанын атап өтті.
КЕЗДЕСУДІҢ ҚОРЫТЫНДЫСЫ ҚАНДАЙ
Кездесуге қатысушылар FIFA президенті Джанни Инфантиноға қолдау көрсететінін растады.
Сонымен қатар, ұйым жобаны дайындау процесіндегі кемшіліктерді ресми түрде мойындап, ұлттық футбол федерацияларынан кешірім сұрады.
