Бес жасар бала Оралда 17 мамыр кешінде қаңғыбас иттердің шабуылынан көптеген тістеген жарақат алды. Баланы ауруханаға жеткізіп, тігіс салып, қажетті екпелерін жасады.
ШАБУЫЛ ҚАЛАЙ БОЛДЫ
Баланың анасы Нәзгүл Сандыбаеваның айтуынша, бала үйдің ауласында ойнап жүргенде оған бірнеше ит шабуыл жасаған. Әйелдің сөзінше, баланы айқайын естіген көршісі құтқарып қалған, деп хабарлайды «Мой город» басылымы.
«Бес жасар ұлымда тірі жер қалмады: иттер оның санын қатты тістеп, арқасын жыртып, қолдары мен саусақтарын тістеп тастады», — деді Нәзгүл.
Оның айтуынша, бала көптеген жарақат алған және қазір дәрігерлердің бақылауында.
ОРАЛ ӘКІМДІГІ НЕ ХАБАРЛАДЫ
Орал әкімдігінде қараусыз жануарларды аулау, зарарсыздандыру, вакцинациялау, сәйкестендіру және уақытша ұстау жұмыстары ҚР «Жануарларға жауапкершілікпен қарау туралы» Заңына сәйкес жүргізілетінін мәлімдеді.
Әкімдіктің дерегінше, сәуір айының басынан бері қалада 283 қараусыз жануар ауланған. Оның 205 иті мен мысығы зарарсыздандыру, вакцинациялау және сәйкестендіруден кейін табиғи мекеніне қайтарылған. Тағы 78 бұрын сәйкестендірілген жануар қайта вакцинацияланып, көшеге қайта жіберілген.
Әкімдік аулауды ізгілікті әдістермен және жануарлардың шоғырланған жерлерін мониторингілеу, сондай-ақ тұрғындардың өтініштері негізінде жүргізілетінін атап өтті.
Сондай-ақ қалалық билік үй жануарларының иелерін оларды күтіп-ұстау және серуендету ережелерін сақтауға және олардың көшеде бақылаусыз жүруіне жол бермеуге шақырды.
ТІСТЕГЕН ҚАНША ЖАҒДАЙ ТІРКЕЛГЕН
Санитарлық-эпидемиологиялық қызметтің дерегінше, сәуірде қалада тістеудің бес жағдайы тіркелген. Тұрғындардың өтініші бойынша екі жануар карантинге орналастырылған.
Бұл ретте зардап шеккен баланың анасы аудан тұрғындары үйлер мен балалар алаңдарының жанында үнемі агрессивті иттер үйіріне тап болатынын айтты.
ЖАҒДАЙ НЕЛІКТЕН ҚОҒАМДЫҚ РЕЗОНАНС ТУДЫРДЫ
Батыс Қазақстан облысындағы (БҚО) оқиға Қазақстанда қараусыз жануарлар туралы заңнамаға өзгерістер енгізу талқыланған тұста болды.
2026 жылғы 19 мамырда Қазақстан Президенті Қасым-Жомарт Тоқаев «Жануарларға жауапкершілікпен қарау туралы» Заңға түзетулерге қол қойды. Өзгерістерге сәйкес, ел АЗВВ — «аулау, зарарсыздандыру, вакцинациялау, шығару» үлгісінен бас тартып, қайтарымсыз аулау жүйесіне көшеді.
Бұған дейін Орал әкімдігі қараусыз жануарларды аулауға негізгі қызмет түрі ет өңдеу және консервілеу болып табылатын «Өркен» ЖШС-мен келісімшарт жасасқан. Келісімшарт құны 9 млн 396 мың теңгені құрады.
Техникалық сипаттамаға сәйкес, мердігер жануарларды аулаумен, оларды уақытша ұстау пункттеріне жеткізумен, сондай-ақ өлтірумен айналысуы керек. Жыл соңына дейін шамамен 2 мыңға жуық жануарды аулау жоспарланған.