Астана соты автобус жүргізушісін 57 жастағы әйел қаза тапқан ЖКО үшін 2 жыл 1 ай бас бостандығынан айыруға үкім етті. Жүргізуші қозғалыс кезінде ұялы телефонмен сөйлесіп, реттелмеген жаяу жүргіншілер өткелінде әйелді қағып кеткен.
ЖКО ҚАЛАЙ БОЛДЫ
Астана қаласы прокуратурасының мәліметтері бойынша, автобус жүргізушісі ұялы телефонмен сөйлесу кезінде реттелмеген жаяу жүргіншілер өткелінен өтіп бара жатқан 57 жастағы әйелді қағып кеткен.
Зардап шеккен әйел ауыр жарақат алып, ауруханада қайтыс болды.
СОТ ҚАНДАЙ ЖАЗА ТАҒАЙЫНДАДЫ
Мемлекеттік айыптаушы сот талқылауы барысында сотталушының кінәсін толық дәлелдеді. Сот оған 2 жыл 1 ай бас бостандығынан айыру жазасын тағайындады, сондай-ақ оны 5 жылға көлік құралдарын басқару құқығынан айырды.
Үкім заңды күшіне енді.
ПРОКУРАТУРА НЕНІ ЕСКЕРТТІ
Астана прокуратурасы жүргізушілер мен жаяу жүргіншілерді жол жүрісі қағидаларын сақтауға шақырды. Ведомство қозғалыс кезінде ұялы телефонды пайдалануға қатаң тыйым салынғанын жеке ескертті.
