Ақмола облысының тұрғыны Instagram желісінде заңсыз құмар ойындар ұйымдастырғаны үшін төрт жыл бас бостандығынан айыруға сотталды. Заңсыз табыс сомасы 90,6 млн теңгеден асты.
НЕ БЕЛГІЛІ
Астана қаласы прокуратурасының мәліметтері бойынша, сотталған әйел Instagram желісінде аккаунт ашып, бір жыл бойы сол арқылы хабарландырулар жариялап, тікелей эфирде құмар ойындар өткізген.
Әр ойынға төрт адам қатысқан. Бәс мөлшері 100-ден 2 100 теңгеге дейін болды. Ең жоғары жүлделі карта түскен қатысушы жеңімпаз атанды.
Ұтыс барлық қатысушылардың бәс сомасының жалпы көлемінен ұйымдастырушының пайызын шегеру арқылы қалыптасты. Ойындар өткізілген уақыт ішінде жалпы заңсыз табыс 90,6 млн теңгеден асты.
СОТ ҚАНДАЙ ЖАЗА ТАҒАЙЫНДАДЫ
Сот әйелді заңсыз ойын бизнесін ұйымдастырғаны үшін кінәлі деп таныды. Оның әрекеттері ҚР ҚК 307-бабының 2-бөлігінің 3-тармағымен («Заңсыз ойын бизнесін ұйымдастыру») сараланды.
Сот оған төрт жыл бас бостандығынан айыру жазасын тағайындады. Сонымен қатар, қала прокурорының заңсыз алынған табысты өндіріп алу туралы талап арызы қанағаттандырылды.
ҚАНДАЙ ЖАУАПКЕРШІЛІК КӨЗДЕЛГЕН
Астана прокуратурасы интернетте арнайы лицензиясыз құмар ойындар мен лотереяларды ұйымдастыру қылмыстық құқық бұзушылық болып табылатынын еске салады.
Ведомствоның ақпараты бойынша, заңсыз ойын бизнесі үшін, оның ішінде Instagram және TikTok арқылы, мүлкі тәркіленіп, белгілі бір лауазымдарды атқаруға немесе белгілі бір қызметпен айналысуға өмір бойы тыйым салынуымен жеті жылға дейін бас бостандығынан айыруға дейінгі жаза көзделген.
КОНТЕКСТ
Бұған дейін Жетісу облысының төрт тұрғыны TikTok желісінде заңсыз құмар ойындар ұйымдастырғаны үшін сотталған. Тікелей эфирлерде олар ақшаға карта ойындарын өткізіп, 95 млн теңге табыс тапқан.
Әрқайсысына мүлкі тәркіленіп, төрт жыл бас бостандығынан айыру жазасы тағайындалды. Қатысушылардың бірі қылмыс жасалған кезде кәмелетке толмаған болған.
