Семей қаласында лицензиясыз алкоголь өнімдерін дайындайтын жерасты цехының қызметі тоқтатылды. Заңсыз айналымнан ондаған мың бірлік өнім мен шикізат алынды.
СХЕМА ҚАЛАЙ ҰЙЫМДАСТЫРЫЛҒАН
Операция Абай облысы бойынша Қаржылық мониторинг агенттігінің (ҚМА) департаментімен облыс прокуратурасының үйлестіруімен және Семей қаласының мемлекеттік кірістер департаментімен өзара іс-қимыл жасау арқылы жүргізілді.
Тергеу нұсқасы бойынша, Семей тұрғыны тиісті лицензиясыз алкоголь өндірісін ұйымдастырған. Дайындау үй-жайларда және гараждарда жүргізілген. Спирт сумен араластырылып, шыны ыдыстарға құйылған.
Өнімдер танымал брендтердің атымен сатылған. Заңды өнімдерге сырттай ұқсас болу үшін әдейі жалған есепке алу-бақылау маркалары қолданылған.
ТІНТУ КЕЗІНДЕ НЕ АЛЫНДЫ
Тергеу іс-әрекеттері барысында заңсыз айналымнан 12 мыңнан астам бөтелке алкоголь өнімі «Finsky Ice» және «Сибирские морозы» атауларымен алынды. Сондай-ақ 8 мыңнан астам бос бөтелке және шамамен 10 мың литр спирт құрамды сұйықтық табылды.
Бұдан басқа, жалған есепке алу-бақылау маркалары мен өндіріс және орау үшін пайдаланылған жабдықтар алынды.
ҚАНДАЙ ШАРАЛАР ҚАБЫЛДАНДЫ
Сот санкциясымен цех орналасқан жеке үйге, сондай-ақ өнімді тасымалдауға пайдаланылған үш автокөлікке тыйым салынды.
Болжамды ұйымдастырушыға қатысты бұлтартпау шарасы ретінде шықпау туралы қолхат және тиісті тәртіп ұстану таңдалды.
Тергеу жалғасуда. Өзге ақпарат ҚР ҚПК-нің 201-бабына сәйкес жариялауға жатпайды.