«Ulysmedia.kz» тәуелсіз басылымының бас редакторы Самал Ибраева Президент Қасым-Жомарт Тоқаевқа редакцияның кәсіби қызметіне жауап ретіндегі цифрлық зорлық-зомбылық көрінісі деп бағалаған оқиғаның тергеуін бақылауға алуды сұрап жүгінді.
Ulysmedia.kz мәліметінше, журналистке бірнеше рет қауіп төнгеннен кейін интимдік қызмет көрсету сайттарының бірінде оның аты-жөні, фотосуреті және жеке телефон нөмірі көрсетілген жалған профиль пайда болған.
Ибраева болған оқиғаны редакцияның беделіне нұқсан келтіруге бағытталған мақсатты шабуыл деп санайды.
«Біз халық пен мемлекет игілігі үшін ғана өткір мәселелерді көтеретін тәуелсіз БАҚ-пыз. Бізді миллиондаған қазақстандық оқып, қолдайды, сондықтан болған оқиғаны олар қауіп және сөз бостандығына қысым жасау әрекеті ретінде қарастырады», - делінген хабарламада.
Журналисттің айтуынша, қылмыстық іс арыз берілгеннен кейін бес күн өткен соң ғана қозғалған.
«Мен және менің әріптестерім осындай жағдайды екі жыл бұрын бастан өткерген болатынбыз – сол кезде іс Президент Тоқаевтың араласуынан кейін жерден алынды. Мен де мемлекет басшысының қолдауына үміт артамын, өйткені журналистерге қатысты мұндай қысым мен қауіп-қатер ол айтып жүрген қағидаттарға қайшы келеді деп санаймын», - деді ол.
Самал Ибраева құқық қорғау органдарынан жалған профильді жасауға қатысы бар адамдарды анықтауды, заңсыз контентті бұғаттауды және кінәлілерді жауапкершілікке тартуды талап етті.
Еске сала кетейік, 5 маусымда Астананың Әкімшілік құқық бұзушылықтар жөніндегі мамандандырылған ауданаралық соты ФБРК негізін қалаушы және «Қазақ чуваш» Telegram-арнасының авторы Кирилл Павловты әлеуметтік желілерде жалған ақпарат таратқаны үшін кінәлі деп таныды.
Әкімшілік іс мамыр айының соңында ауыл шаруашылығы министрлігі аграрлық сарапшыны сотқа бергеннен кейін қозғалды. Ведомство Павловты фермерлердің егістіктеріне шегіртке шабуылы және мемлекеттің зиянкестермен күрес әдістері туралы шындыққа жанаспайтын мәліметтер таратты деп айыптады.
Шешім шыққаннан кейін ФБРК негізін қалаушы жағдайға түсініктеме беріп, айыппұлды «сарапшылар қауымдастығына аяқтан ату» деп атады. Оның пікірінше, аналитиктерді болжам жасаудан және ресми статистиканы сыни тұрғыдан талдаудан бас тартуына әкелуі мүмкін қауіпті прецедент жасалған. Сарапшы әртүрлі салаларда – астық өнімділігінен инфляция көрсеткіштеріне дейін ресми деректер мен шындық арасындағы жүйелі алшақтықтарды атап өтті.