Жамбыл облысында мектеп кітапханашылары үстемақыны екі ай бойы алмағандарын мәлімдеді.
Informburo.kz дерегі бойынша, олар қыркүйек айынан бастап жалақылары 35%-ға төмендегенін айтады.
«Бұл біздің қалтамызға әсер етті. Бір ай шыдадық, екі ай шыдадық, бірақ бәрінің де шегі бар. Маған қатты өкінішті. Барлық нәрсенің бағасы өсіп жатыр, ал біздің жалақымыз төмендеді», – деп наразылық білдірді Айжан Кәрімова.
Сонымен қатар кітапханашылар біліктілігіне қарамастан мектептерде техникалық персонал ретінде тіркелетіндерін айтты.
Өз кезегінде облыстық білім басқармасының басшысы Рауан Садырқұлов тексеру комиссиясы мектеп кітапханашыларына үстемақы төлеуді негізсіз деп санағанын мәлімдеді.
«Көшеге шығу – білімді адамдардың мәселені шешу тәсілі емес. Тексеру нәтижесінде үстемақының негізсіз төленгені анықталды. Біз заңды деп ойладық. Бірақ қадағалау органдары басқаша ойлайды», – делінген хабарламада.
Сонымен бірге білім басқармасының өкілдері мәселе жақын арада шешілетінін және екі айдағы төлемдер толық көлемде қайтарылатынын сендірді.
Еске сала кетейік, сәуір айында Ақмола облысында прокурорлар «Бурабай Су Арнасы» МКК қызметкерлеріне жалақы төленбеген фактіні анықтады. Қаңтар айында кәсіпорын 205 қызметкерге 26,7 млн теңге қарыз болған.
Тамыз айында Ақтөбе облысының Құмжағыз және Ойыл аудандарындағы балабақша қызметкерлері 2022 жылдан 2024 жылға дейін төленуі тиіс жалақыға үстемақыларды толық алмағаны хабарланды.
Сонымен қатар Ақмола облысы Зеренді ауданындағы мемлекеттік кәсіпорын 943 қызметкерге жалақы төлемегені белгілі болды. Қарыз 397 млн теңгені құраған.