Жамбыл облысының Меркі ауданы, Ақтоған ауылының балалары мектеп құрылысы аяқталмағандықтан Мәдениет үйінде оқуға мәжбүр. Informburo.kz мәліметінше, қазіргі уақытта Мәдениет үйінің ғимаратында 600 мектеп оқушысы білім алуда.
Мектеп директоры мекеме басшылығы бұл қадамға амалсыздан баруға мәжбүр болғанын айтты. «Оқу кабинеттері» деп аталатын бөлмелерді перде бөліп тұр, ал баспалдақ алаңын мекеме қызметкерлері мұғалімдер бөлмесі ретінде пайдаланады.
«Мәдениет үйінің дәлізінде үш сынып жасалды. Мұнда 4 "Ә" және 2 "А" сыныптары екі ауысымда оқиды. Мұнда 4 "А" сыныбы оқиды. Бізге құрылыс материалдары берілді. Біз өз тарапымыздан қажеттілікке қарай ыңғайлы болу үшін өзгерістер енгізіп жатырмыз», – дейді №4 орта мектептің директоры Ілияс Жүнісжанов.
Өз кезегінде аудандық білім бөлімінің басшысы Әйгерім Алтынбаева мектеп құрылысының кешігуіне мемлекеттік сатып алуды қадағалайтын мамандар кінәлі екенін айтады.
«Менің ойымша, білім беру ұйымдарында күрделі жөндеуді уақытында бастау үшін мемлекеттік тапсырыс процесі жыл басында басталса жақсы болар еді. Біз қаңтар айынан бастап өтінім береміз. Бірақ әртүрлі себептермен тендер кеш өткізілді», – деді ведомство басшысы.
Еске сала кетейік, бұған дейін белгілі болғандай, Қостанай облысының Әулиекөл ауданы, Новонеженка ауылында оқушылар жартылай жөнделген ғимаратта оқуға мәжбүр. Ғимаратта тек төрт кабинет дайын, онда орта буын оқушылары үшін сабақтар өтеді.
Жоғары сынып оқушылары жергілікті күрес залында, ал бірінші сынып оқушылары балабақшада сабақ оқиды. Новонеженка орта мектебінде барлығы 300-ден астам оқушы бар екені хабарланады.