Қордай ауданы Жамбыл облысында ветеринария бөлімінің бастығы Ғалым Сабралы қызметтік кабинетінде өз-өзіне қол жұмсамақ болды.
Telegram-арнасы «HALYQSTAN» мәліметінше, Сабралы сол қолының венасын кескен. Қазір ол есінде, өміріне қауіп жоқ. Жедел жәрдем бригадасы оны аудандық орталық ауруханаға жеткізді.
Жергілікті атқарушы және құқық қорғау органдары әзірге оқиғаға түсініктеме берген жоқ. Қордайлықтардың айтуынша, оқиға орнын полиция қоршауға алған.
Журналистер Ғалым Сабралы облыстық ветеринария станциясы қызметкерлерінің келуіне байланысты суицид жасамақ болды деп болжауда.
«Бұған дейін барлық аудандық ветеринария бөлімдерінде кешенді тексеру жүргізілген болатын. Сабралыда бірнеше рет бұзушылықтар үшін ескертулер болған, ол оларды желтоқсан басына дейін жоюы керек еді. Дәл осы бұзушылықтардың жойылуын тексеру мақсатымен ауданға облыстық ветеринария станциясының мамандары келген», - делінген хабарламада.
Естеріңізге сала кетейік, ақпан айында Түркістан облысы Мақтаарал ауданы білім бөлімінің бухгалтері суицид жасаған еді. БАҚ болжауынша, оған ведомство бухгалтерлеріне қатысты қозғалған қылмыстық іс себеп болған. Облыстық экономикалық тергеу департаментінде оларға қатысты бюджет қаражатын ұрлауға байланысты тергеу жүргізілгенін айтқан болатын.