Солтүстік Қазақстан облысының мамандандырылған табиғат қорғау прокуратурасы Юртовое көлі орналасқан жер учаскесін беру кезінде заңбұзушылықты анықтады.
Ведомствоның баспасөз қызметінің мәліметінше, 2023 жылы ауданы 55 га жер учаскесі орман өсіру мақсатында пайдалануға берілген.
Бұл ретте аумақ ауыл шаруашылығы жануарларын жаюға арналған жайылымдық жерлерге жатқызылған. Сонымен қатар учаскенің 40 га жерін су айдыны алып жатыр, бұл оны су қорының бөлігі етеді.
«Жер кодексінің 135-бабы және Су кодексінің 119-бабының талаптарына сәйкес, мұндай жерлерді орман өсіруге беру су ресурстарын қорғау саласындағы уәкілетті органның оң қорытындысы болған кезде ғана мүмкін, ал бұл жағдайда ол болмаған», - делінген хабарламада.
Айқын бұзушылықтарға қарамастан, жер комиссиясы учаскені жалға беру туралы оң қорытынды шығарған.
Прокуратураның араласуынан кейін сот жерді беруді заңсыз деп танып, кадастрлық құны 117 млн теңгеден асатын учаскені мемлекет меншігіне қайтару туралы шешім қабылдады.
Жер комиссиясының мүшелері, сондай-ақ Мамлют ауданы әкімдігінің жер қатынастары бөлімінің және мемлекеттік құқық бөлімінің басшылары толық емес қызметтік сәйкестік түрінде тәртіптік жауапкершілікке тартылды.
Еске сала кетейік, бұған дейін OLX.kz сайтында Солтүстік Қазақстан облысында орналасқан Кривое көлін 5,5 млн теңгеге сату туралы хабарландыру пайда болған еді. ФБРК редакциясы егжей-тегжейлі талдау кезінде іс жүзінде көлдің өзі емес, ұзақ мерзімді жалдау құқығымен жағалаудың бір бөлігіне иелік ететін компания сатылып жатқанын, ал хабарландырудағы телефон нөмірі қазақстандық мемлекет қайраткері Аман Түрегелдинге тиесілі екенін анықтады.