Сыбайлас жемқорлыққа қарсы еріктілер 7 млрд теңгеден астам қаражаттың ұтымсыз жұмсалуының алдын алды.
Антикор баспасөз қызметінің мәліметінше, еріктінің араласуынан кейін Орал қаласының әкімдігі бейнеконференцбайланыс жабдығын 45 млн теңгеге сатып алудан бас тартты, себебі ұқсас жабдықтың нарықтық құны бар болғаны 4 млн теңге шамасында.
Тағы бір жағдайда Шымкент қаласының еріктілері білім басқармасы мен бірнеше мектептің жетім балаларға арналған жазғы демалысты ұйымдастыру бойынша сатып алуды қайталау фактісін анықтады. Нәтижесінде белсенділер 78 млн теңгенің тиімсіз жұмсалуының алдын алды.
Түркістан қаласында еріктілер жылу энергиясын есептеу кезінде тарифтердің негізсіз көтерілу фактісін анықтады.
«Көпқабатты тұрғын үйлерде есептеуіш құралдары орнатылғанына қарамастан, есептеу шаршы метрмен жүргізіліп, жылыту құнының өсуіне әкелді. Қабылданған шаралар нәтижесінде 32 көпқабатты тұрғын үйдің 2 мыңнан астам тұрғынына шамамен 13 млн теңге сомасына қайта есептеу жүргізілді», - делінген хабарламада.
Астана қаласында еріктілер «Жұмыс істейтін жастарға арналған жалдамалы тұрғын үй» бағдарламасы бойынша берілген 30 пәтердің жай-күйін тексерді.
«Тексеру нәтижелері бойынша мердігерлер радиаторлар мен электр розеткаларының жоқтығы, сондай-ақ аяқталмаған құрылыс-монтаж жұмыстары және басқа да ақаулар сияқты көптеген кемшіліктерді жойды», - деп хабарлады Антикорда.