Өскеменде сұлулық салонына келген әйел блефаропластика - қабақты өзгерту операциясынан кейін қайтыс болды.
YK-news.kz деректері бойынша, қалалық сотта косметологтың көмекшісіне үкім шығарылды, оның инъекциясынан кейін әйел қайтыс болды. Белгілі болғандай, сотталушы косметологтың көмекші-ассистенті болған.
Операциядан кейін косметолог одан науқасқа укол салуды сұраған. Алайда кейін клиенттің жағдайы нашарлай бастаған.
«Медициналық қызметке лицензиясы болмай, А. науқасқа сынама ретінде лидокаин қосылған цефтриаксонды бұлшықет ішіне енгізді. Инъекция енгізілгеннен кейін науқастың жағдайы нашарлады», – деп хабарлады сотта.
Әйелді медициналық орталыққа жеткізгенімен, оны құтқару мүмкін болмағаны айтылады.
Нәтижесінде сот сотталушыны заңсыз медициналық қызметпен айналысқаны үшін кінәлі деп танып, оған 2,5 жыл бас бостандығын шектеу және 3 жыл бойы медициналық қызметпен айналысу құқығынан айыру жазасын тағайындады.
Еске сала кетейік, бұрын Астанада сотталған азамат дәстүрлі емес шығыс медицинасы қызметін көрсетіп, абайсызда адам өліміне әкеп соқтырған болатын. Сонымен қатар, сотталушының тиісті сертификаттары мен лицензиялары болмаған.
Сондай-ақ хабарланғандай, Таразда хирургтар заңсыз медициналық қызметі үшін 4 жыл бас бостандығынан айыру жазасына кесілді. Олардың біліксіз әрекеттерінің салдарынан тоғыз адам әртүрлі жарақаттар алған.