Премьер-министр Олжас Бектенов Президент тапсырмасы бойынша Түркістан облысы активіне жаңа әкімді таныстырды.
Үкімет баспасөз қызметінің мәліметінше, депутаттарға Қасым-Жомарт Тоқаевтың Түркістан облысының әкімі лауазымына екі кандидат ұсыну туралы хаты оқылды.
Лауазымға Түркістан облысы әкімінің орынбасары Нұралхан Кушеров және Созақ ауданының әкімі Мұхит Тұрысбеков ұсынылды.
Кушеров үшін депутаттар 288 дауыстың 224-ін бергені атап өтілді. Жиналыс қорытындысы бойынша Президент Жарлығымен ол Түркістан облысының әкімі болып тағайындалды.
Белгілі болғандай, 2015-2018 жылдары Нұралхан Кушеров Шымкент қаласы әкімінің орынбасары болып жұмыс істеді. 2018-2021 жылдары Ақтау қаласы бойынша мемлекеттік кірістер басқармасының басшысы және Шымкент қаласы бойынша мемлекеттік кірістер департаментінің басшысы қызметтерін атқарды. 2021-2023 жылдары Атырау облысы бойынша мемлекеттік кірістер департаментінің басшысы болды.
Еске сала кетейік, Кушеров әкім қызметінде Президент Қасым-Жомарт Тоқаев Президент Әкімшілігінің басшысының бірінші орынбасары етіп тағайындаған Дархан Сатыбалдыны ауыстырды.