2023 жылғы тамызда Петропавлда Назарбаев, Мұқанов және Ульянов көшелеріндегі үйлерден тұратын «кубик» деп аталатын жерге байланысты жанжал өршіді. Жергілікті тұрғындардың айтуынша, 2000-жылдардың басында шенеуніктер тұрғындардың автотұрақ, балалар алаңы және тұрмыстық қалдықтар орны ретінде пайдаланған аула аумағын жеке қолдарға сатып жіберген.
Ratel.kz деректеріне сәйкес, жер бірнеше рет қайта сатылған, міне, тамыз айында жаңа иесі биік қоршау тұрғызып, элиталық көппәтерлі тұрғын үй құрылысын бастайтынын хабарлаған.
Үй тұрғындары аумақтың тұрғын үй қорынан қалай алынып тасталғанына және 15 жыл бойы ол жерде ешқандай әрекет жасалмағанына таң қалды. Сонымен қатар, олар құрылыс салдарынан ескі үйге жарықшақ кетуі мүмкін, ал жаңа нысан өрт сөндірушілер мен жедел жәрдемнің жолын жауып тастайды деп қауіптенген. Нәтижесінде тұрғындар петиция жасап, 200 қол жинады.
Өз кезегінде құрылыс салушының өкілі - «Tamila Invest» ЖШС директоры Марат Жакетов 2023 жылы оның компаниясы 5 қабатты үй салу үшін жерді меншігіне сатып алғанын және ол құрылысқа рұқсат беретін барлық құжаттарды алғанын жеткізді. Петропавл әкімдігі құрылыс салушының ұстанымын растады.
Қалалық билік тарапынан қолдау таппаған тұрғындардың бастамашыл тобы «AMANAT» партиясының филиалына келді, онда дәл сол кезде сот-құқықтық мәселелер бойынша азаматтарды қабылдау өтіп жатқан еді. Адамдарды №2 қалалық сотының судьясы Ұлан Әбдірахманов тыңдады.
«Сіздер мемлекеттік органдардың құрылыс салушыға жер учаскесін бөлу туралы әрекеттеріне сотқа шағым жасай аласыздар. Әкімшілік сотқа талап-арызды тұрғындардың мүддесін білдіретін ұйым ретінде МББ (мүлік иелерінің бірлестігі) арқылы беруге болады. Жаңа Әкімшілік-процестік кодекс дауларды шешудің сотқа дейінгі тәртібін де қарастырады. Бірақ егер сіздің мемлекеттік органға жіберген сұранысыңызға бас тарту келсе, онда сотқа жүгіну керек», - деп түсіндірді судья.
«Кубиктің» тұрғындары оның кеңесіне құлақ асты. Нәтижесінде айлар бойғы талқылаулардан кейін Петропавлдың №2 соты СҚО жер ресурстарын басқару департаментінің талап-арызын қанағаттандырып, жер учаскесі бойынша барлық мәмілелерді жарамсыз деп таныды.
«Жобаға сәйкес, 1-қабаттың еденінің құрамында және шатырдың құрамында жылытқыш ретінде жанғыш материал - пенополистирол қабылданған, оның тұтануы жағдайында өрт үйлерге әсер етуі мүмкін. <…> Қалыңдығы 380 мм кірпіш қабырғалар ұзындығы 8,0 м болатын құрама т/б жабын плиталарының салмағынан тыс центрден тыс сығылу есебімен негізделмеген, бұл ғимараттың құлауына әкелуі мүмкін», - деп көрсетілген сот шешімінде.
Сол сот Петропавл әкімдігінің сәулет және қала құрылысы басқармасына қатысты тағы бір талап-арызды қанағаттандырып, үйге, инженерлік желілерге және абаттандыруға арналған АПЖ (сәулет-жоспарлау тапсырмаларын) заңсыз деп таныды. Себебі оларды беру нәтижесінде жауапкер құрылыс нормалары мен ережелерінің көптеген бұзушылықтарына жол берген.