Президент Қасым-Жомарт Тоқаев қалдықтарды қайта өңдеудің заманауи жүйесін жедел қалыптастыру қажеттігін мәлімдеп, үкіметке экология саласында бірқатар нақты тапсырмалар берді.
Ақорданың дерегінше, Астанада, Алматыда және Шымкентте бір мезгілде электр энергиясын өндірумен қатар тәулігіне 1,5 мың тоннаға дейін қалдықты кәдеге жаратуды көздейтін жобалар пысықталуда. Жалпы ел бойынша қалдықтарды кәдеге жарату саласында 40-тан астам жобаны жүзеге асыру жоспарлануда.
«Олардың барлығы сапалы әрі уақытылы іске қосылуы тиіс. Сұрыптау қуаттары мен қоқыс полигондарын дамытуға да назар аудару маңызды», — деп атап өтті мемлекет басшысы.
Президент атап өткендей, халықаралық тәжірибе бұл мәселелерді кейінге қалдырудың күрделі экологиялық проблемаларға әкеліп, халықтың өмір сүру сапасына әсер ететінін көрсетеді. Осыған байланысты үкіметке қалдықтармен жұмыс істеу саласын дамыту бойынша кешенді шаралар қабылдау тапсырылды.
Қасым-Жомарт Тоқаев ірі қалалар мен облыс орталықтарының қала маңы аймақтарында экологиялық саябақтар құру мәселесіне жеке тоқталды.
«Үкімет өңір әкімдерімен бірлесіп, экологиялық саябақтар құру бойынша шаралар қабылдауы керек. Бұл стратегиялық сипаттағы міндет. Президент Әкімшілігі осы міндеттің орындалуын бақылауда ұстайды», — деді ол.
Президент демалыс және мереке күндері астана тұрғындары көптеп баратын Бурабайға түсетін шамадан тыс жүктемеге назар аударды, бұл табиғи парктің экожүйесіне теріс әсер етеді. Оның айтуынша, мегаполистерге жақын жерлерде экологиялық саябақтар құру ерекше қорғалатын табиғи аумақтарға антропогендік жүктемені азайтуға мүмкіндік береді.
Сонымен қатар Тоқаев экологиялық саябақтарды дамытуда тазалық негізгі шарт болып қалуы керек екенін атап өтті.
«Бурабайда не болып жатқанын қараңыздаршы. Жай ғана ұят. Ол жерге бөтен планетадан келгендер қоқыс тастамайды, біздің халық тастайды», — деп атап өтті мемлекет басшысы.
Еске сала кетейік, бұған дейін экология және табиғи ресурстар министрі Ерлан Нысанбаев 91% үйінділердің жойылғанын хабарлаған. Оның айтуынша, ағымдағы жылдың қорытындысы бойынша ірі кәсіпорындардың нормативтік шығарындылары көлемі 2022 жылмен салыстырғанда 148 мың тоннаға, немесе 7,2%-ға қысқарған.