Ақмола облысында су тасқынынан автожолдарда 35 су асып кету жағдайы тіркелді. Оның 17 учаскесі су астында қалып, ерекше бақылауда тұр.
«Қазинформ» ХАА өңірдің жолаушылар көлігі және автомобиль жолдары басқармасының басшысы Владимир Кулаковқа сілтеме жасап, облыс аумағында 181 көпір және 3 мыңнан астам су өткізу құрылысы орналасқанын хабарлады.
«Көктемгі кезеңде жол қозғалысының қауіпсіздігін қамтамасыз ету үшін мердігер ұйымдар көпірлер мен су өткізу құрылыстарын тазарту жұмыстарына қажетті мөлшердегі құрал-жабдықтармен және техникамен жабдықталған бригадаларды құрды. Қазіргі уақытта тәулік бойы патрульдеу, кезекшілік, су тасқыны суларының өтуін тұрақты бақылау және барлық ауылдық округ әкімдері мен жол ұйымдарынан қажетті ақпарат жинау ұйымдастырылды», — деді спикер.
Көпжылдық бақылауларға сәйкес, өңірде су тасқыны кезінде су асып кету немесе су басу болатын автожолдардың 33 осал учаскесі белгіленген.
2024 жылы су асып кетулер салдарынан жалпы ұзындығы 20 км-ден асатын 40-қа жуық автожол учаскесі зардап шеккені атап өтіледі. Кулаковтың нақтылауынша, олардың барлығы қалпына келтірілген.
Сондай-ақ, су тасқыны үш көпірге зақым келтірді: «Жалтыр — Макинск», «Кийма — Терісақан» жолдарында және Көкшетаудағы Ашимов көшесінде. Қазір бұл нысандар үшін жобалық-сметалық құжаттама (ЖСҚ) әзірленуде. Билік 2025 жылдың мамырында оң қорытынды алуды жоспарлап отыр.
«Өткен жылы 40 су өткізу құбыры орнатылды. Сондай-ақ, 60-тан астам қолданыстағы су өткізу құрылысына жөндеу жүргізілді. Оның ішінде «Жолымбет-Шортанды-Пригородное» автожолының 29-шы км-дегі құбырға күрделі жөндеу жүргізіліп, Астана қаласының «Шығыс айналма» автожолының Сарыоба станциясында жеті су өткізу құбыры орнатылды. Бұл су тасқыны аталған құбырлардың толық көлемде жұмыс істеп, қозғалыс қауіпсіздігін қамтамасыз ететінін көрсетіп отыр», — деп қосты Кулаков.
Оның айтуынша, «Атбасар — Сочинское» трассасының 19-шы км-де көпір құрылысы жалғасуда. «Есіл — Свободное — Раздольное» трассасының 13-ші км-де көпір салудың тағы бір жобасы ЖСҚ түзету сатысында тұр.
«Су деңгейі төмендегеннен кейін бірден жол жүру бөлігі мен зардап шеккен жол жиектерін қалпына келтіру жұмыстары басталады. Қараөзек ауылын алатын болсақ, бұл Бұланды ауданында орналасқан аудандық маңызы бар жол. Бүгінде көпір салуға ЖСҚ әзірлеуге қаражат бөлінді. Биылғы жылы ЖСҚ әзірлеуді жоспарлап отырмыз, ал 2026 жылы қаражат бөлінген жағдайда іске асыруды бастауды жоспарлап отырмыз. Осыдан кейін ауыл су тасқыны кезеңінде көлік қатынасымен қамтамасыз етіледі», — деп атап өтті спикер.
Бүгінде бірнеше учаскеде көлік қатынасы жоқ. Мысалы, «Есіл — Свободное — Раздольное» автожолында. Оқшауланған ауылдарға дәрі-дәрмек жеткізіліп, науқастар эвакуацияланды. Су деңгейі төмендей бастағаны хабарлануда.
Кулаков «Атбасар — Сочинское» трассасы бойынша да өтудің жоқтығын атап өтті. Астрахан ауданында да күрделі жағдай сақталуда. Первомайка, Камышенка және Лазовое ауылдарымен көлік қатынасы жоқ, алайда аудандық маңызы бар жол арқылы ыңғайсыз айналма жол бар.