Өскеменде «Азия АВТО» компаниясының топ-менеджерлеріне үкім шығарылды.
«31 арна» хабарлағандай, сот отырысында Елена Кузьмина, Игорь Потапов, Ержан Мандиев, Дмитрий Борзых, Константин Лобанов, Андрей Рябец, Александр Толстиков және Галина Мокина айыпталушылар лауазымында болды. Олар алаяқтық, ақшаны жылыстату және салық төлеуден жалтару бойынша айыпталды.
Іс бойынша зардап шеккендер ретінде Jusan Bank және индустрия және инфрақұрылымдық даму министрлігі танылды. Белгілі болғандай, айыптау тарапы мемлекетке келтірілген залалды дәлелдей алмаған. «Алаяқтық» бабы «Алдау немесе сенімді теріс пайдалану жолымен мүліктік залал келтіру» болып қайта сараланған.
Нәтижесінде сот Кузьмина мен Потаповты ақтады. Қалған айыпталушыларға 2,5 жылдан 2 жыл 8 айға дейін бас бостандығынан айыру жазасы тағайындалды. Алайда сот олардың қамауда және үй қамағында өткізген уақытын ескеріп, жазаны өтелді деп санады.
Сот Jusan Bank-тың айыпталушыларға қатысты азаматтық талап-арызын да қанағаттандырудан бас тартты.
««Jusan Bank» АҚ-ның 6 612 021 987 теңге көлеміндегі залалды өтеу туралы азаматтық талап-арызын қанағаттандырудан бас тартылсын. 992 948 теңге көлеміндегі процестік шығындар мемлекет есебіне қабылдансын. Мүлікті тәркілеуді қамтамасыз ету шараларының күші жойылсын», – деді судья.
«Азия АВТО» басшылары Анатолий Балушкин мен Ерік Сағымбаевқа қатысты сот процестері жалғасуда.
Еске сала кетейік, 2023 жылғы мамырда ҚММ «Азия-Бипэк АВТО» директорлар кеңесінің төрағасы Анатолий Балушкинге, «Азия АВТО» АҚ бас директоры Ерік Сағымбаевқа және компаниялар тобының бірқатар топ-менеджерлеріне қатысты сотқа дейінгі тергеп-тексеруді бастады. Олар сол кезде 230 млрд теңгеден астам қаражатты жымқыруда айыпталды.
2024 жылғы тамызда Өскеменде Анатолий Балушкинге қатысты сырттай сот процесі басталды. 2020 жылы билік компаниямен келісімшартты бұзып, үкімет бөлген 174 млрд теңге көлеміндегі қаражатты қайтаруды талап еткені хабарланды. Тергеу нұсқасы бойынша, компания өкілдері автомобильдерді өнеркәсіптік құрастыру жөніндегі міндеттемелерін орындамаған. Осы сомаға компания 10 жыл ішінде жеңілдіктер алған.