Ақтау әкімшілік құқық бұзушылықтар жөніндегі мамандандырылған соты 27 тамызда Алматы әуежайында болған оқиғадан кейін қала прокуроры Ерболат Әбдіровке қатысты қозғалған істі тоқтатты.
9 қыркүйекте «Yedilov Online» Telegram-арнасында Әбдіровтің Алматы әуежайында көлік полициясы департаменті қызметкерлерімен «мас бұзақылық» үшін ұсталғаны туралы ақпарат пайда болды.
Арнаның мәліметінше, прокурорға қатысты ҚР ӘҚБтК-нің 440-бабы 1-бөлігі («Алкогольдік ішімдіктер ішу немесе қоғамдық орындарда мас күйінде жүру») және ҚР ӘҚБтК-нің 434-бабы 1-бөлігі («Қоғамдық орындарда былапыт сөйлеу, азаматтарға қорлайтын түрде жəбір көрсету жəне қоғамдық тәртіпті бұзатын өзге де əрекеттер») бойынша әкімшілік хаттамалар толтырылды.
Өз кезегінде «Ақ Жайық» басылымы сот қаулысына сілтеме жасап, оқиғаның мән-жайын нақтылайды.
Қолда бар ақпарат бойынша, Әбдіров Алматы әуежайында өзінің екі жерлес ағайынымен танысқан. Жолаушыларды ұшаққа жеткізетін автобуста жанжал туындаған көрінеді. Келесі күні полицейлер прокурорға қатысты әкімшілік хаттама толтырды. Алайда сотта ағайындылар жанжал болмағанын және Әбдіровке ешқандай шағымы жоқ екенін мәлімдеді.
Сонымен қатар сот Әбдіровтің іс-әрекеттерінде ҚР ӘҚБтК-нің 434-бабы 1-бөлігінде көзделген құқық бұзушылық құрамы жоқ екенін анықтады.
Сот келесі мән-жайларды ескерді:
- прокурор былапыт сөйлемеген және айналасындағыларға жəбір көрсетпеген;
- оқиға болған автобус қоғамдық орынға емес, арнайы көлікке жатады;
- сараптама Әбдіровтің «есі анық, сөйлеуі байланысты, уақыт, жағдай және өз басының кім екендігі туралы бағдарланған» күйде болғанын растады.
10 қыркүйекте іс әкімшілік құқық бұзушылық құрамының болмауына байланысты тоқтатылды. Алайда 11 қыркүйекте Бас көлік прокуратурасы мәлімдегендей, Әбдіровке қатысты істі тоқтату туралы сот қаулысының заңдылығына тексеру жүргізуде.
Әлеуметтік желілердегі «мас бұзақылық» туралы алғашқы хабарламалар сотта расталмады. Сонымен қатар, басталған тексеруді ескере отырып, істің тоқтатылуының заңдылығы туралы түпкілікті қорытынды жасау әлі ерте.