(4 ақпан 2026 | Дереккөз: Ұлытау облысы прокуратурасының баспасөз қызметі)
Ұлытау облысында сот марганец кентасын лицензиясыз және жер қойнауын пайдалануға келісімшартсыз заңсыз өндірген іс бойынша үкім шығарды. Қостанай облысының тұрғыны бірнеше жыл бойы пайдалы қазбаларды өндіруді ұйымдастырып, оларды ішкі және сыртқы нарықта өткізуден түскен кірістерді заңдастырып келген.
ЗАҢСЫЗ ӨНДІРУ СХЕМАСЫ ҚАЛАЙ ЖҰМЫС ІСТЕДІ
Ұлытау облысы прокуратурасында хабарлағандай, тергеу экономикалық тергеу департаментімен бірлесіп жүргізілді. Қостанай облысының 50 жастағы тұрғыны 2020 жылдан 2023 жылға дейінгі кезеңде жер қойнауын пайдалануға лицензиясы мен келісімшарты болмаса да, «Шығыс Қаражал» кен орнында марганец кентасын өндіруді ұйымдастырғаны анықталды.
Іс материалдарында өндірілген кентастың шығарылып, сатылғаны, ал алынған кірістер ақша қаражатын қолма-қол ақшаға айналдыру және жалған мәмілелер арқылы заңдастырылғаны көрсетілген.
ӨНДІРУ КӨЛЕМІ ЖӘНЕ КЕЛТІРІЛГЕН ЗАРДАП
Заңсыз қызмет кезеңінде 16 мың тоннадан астам марганец кентасы жөнелтілді. Тергеу деректері бойынша, мемлекетке келтірілген тікелей залал 1,3 млрд теңгеден асты.
Сонымен қатар, темір-марганец кентасын қайта өңдеу және одан әрі ішкі нарықта және Қазақстаннан тыс жерлерде сату нәтижесінде сотталушы 3,5 млрд теңгеден астам кіріс алды.ҮКІМ ЖӘНЕ МҮЛІКТІ ТӘРКІЛЕУ
Ұлытау облысы сотының үкімімен ер адам 5 жыл 4 айға бас бостандығынан айыруға сотталды. Оған қосымша жер қойнауын пайдалану саласындағы қызметпен 5 жыл мерзімге айналысуға тыйым салынды.
Мемлекет кірісіне 4,8 млрд теңге өндірілді. Сондай-ақ, сот іс материалдарына сәйкес, қылмыстық жолмен алынған қаражатқа сатып алынған 3 жеңіл автомобиль мен 2 ауыр жүк көлігін тәркілеу туралы шешім шығарды.
Үкім заңды күшіне енді.