Шымкент прокуратурасы кәсіпкерлердің нақты жұмыс орындамай, 6,4 млрд теңгеден астам сомаға шот-фактуралар жазып беру фактілерін анықтады.
Баспасөз қызметінің мәліметінше, ведомство ҚК 216-бабының 3-бөлігі (Жұмыстарды нақты орындамай, қызметтерді көрсетпей, тауарларды жөнелтпей шот-фактура жазу бойынша әрекеттер жасау) бойынша сотқа дейінгі тергеуді бастады.
Материалдар экономикалық тергеу департаментіне берілді. Ведомство мемлекетке келтірілген залалды өтеу мақсатында сотқа 4 талап арыз берді.
Тәртіптік жауапкершілікке уәкілетті органның 17 лауазымды тұлғасы тартылды.
Естеріңізге сала кетейік, тамыз айында хабарланғандай, Қостанай облысында шаруа қожалығының басшысы 1 млрд теңгеге жалған шот-фактуралар жазған. Осы әрекеттердің нәтижесінде контрагенттер мемлекет бюджетіне 200 млн теңгеден асатын сомаға салық төлеуден жалтарған.
Мамыр айында 35 млн теңгеден астам соманы жанап кеткен балабақша меңгерушілері мен қызметкерлеріне, ЖШС директорына үкім шығарылды. Меңгерушілер сатып алынбаған тамақ өнімдеріне өтінімдер беріп, сондай-ақ объектісі дұрыс көрсетілмеген электрондық шот-фактуралар, жүкқұжаттар, салыстыру актілерін жазған.
Сонымен қатар, Шымкент қалалық ауданаралық қылмыстық соты іс қарап жатқаны хабарланды, ол бойынша «КУАТЖЫЛУОРТАЛЫҚ-3» МКК-нің бұрынғы басшысы, Шымкент қаласы энергетика және инфрақұрылымды дамыту басқармасының бұрынғы басшылары, сондай-ақ құрылыс және энергетикалық бизнеспен айналысатын фирмалар мен компаниялардың директорлары сотталушылар отырғызылды.
Олар жалған шот-фактуралар жазу, қызмет бабын пайдаланып мүлікті жымқыру, сондай-ақ қылмыстық жолмен алынған ақшаны немесе мүлікті жылыстатуда айыпталды.