Сәтбаевта үш жасар қыздың анасы «Нұрбобек» балабақшасындағы буллинг туралы хабарлады. Ол қызын «шамамен 8 ай бойы жат қылып, ұрып, қорлағанын», ал мекеме қызметкерлері болған жағдайды біліп тұрып, еш әрекет етпегенін мәлімдеді.
Анасы өзінің Instagram-парақшасында мекеменің бақылау камераларынан алынған бейнежазбаны жариялады. Кадрларда бір ұл баланың қызды қолынан тартып, еденге лақтырғаны, содан кейін тағы бірнеше баланың жаман үлгіге еріп, келіп, баланы ұрып, тартқылағаны көрінеді.
Жанында тұрған тәрбиеші алдымен араласпайды, кейін ғана жанжалды тоқтатады.
Centralmedia24.kz сайтының хабарлауынша, Ұлытау облысы полиция департаменті оқиға бойынша тексеру жүргізіліп жатқанын растады.
«Оқиға Сәтбаев полициясында тіркелді. Оқиғаға қатысы бар барлық тараптардың қатысуымен тергеу әрекеттері жүргізілуде, балабақша қызметкерлерінен, ата-аналар мен куәгерлерден мәліметтер жиналуда. Тексеру нәтижелері бойынша болған оқиғаға құқықтық баға беріліп, заңда көзделген шаралар қолданылады», — деп хабарлады ведомствода.
Еске сала кетейік, қараша айында Алматыда Әуезов ауданындағы №29 балабақшада әлеуметтік желіде тәрбиешінің балаларға қатысты физикалық күш қолданған видеосы тарағаннан кейін тексеру басталған еді. Бұған дейін осы мекеменің асханасынан тарақандар табылған.